காதலித்து சாதி மறுப்பு திருமணம்... கட்டாய கருக்கலைப்பு செய்ததாக கணவர், மாமியார் மீது புகார்!

கரூர் மாவட்டம் குளித்தலை அருகே காதலித்து கலப்பு திருமணம் செய்துகொண்ட பெண்ணுக்கு கட்டாயமாக கருக்கலைப்பு செய்ய வைத்ததாக கணவர் மற்றும் அவரது பெற்றோர் மீது புகார் அளிக்கப்பட்ட சம்பவம் பரபரப்பை ஏற்படுத்தியுள்ளது.குளித்தலை அருகே காக்கையம்பட்டியைச் சேர்ந்த முத்துலட்சுமி, காணப்பட்டியில் உள்ள அரசு பாலிடெக்னிக் கல்லூரியில் படித்தபோது அதே கல்லூரியில் படித்த கார்த்திக்கை காதலித்ததாக கூறப்படுகிறது. இருவரும் வெவ்வேறு சமூகங்களைச் சேர்ந்தவர்கள் என்பதால், சென்னைக்கு சென்று திருமணம் செய்து கொண்டு சுமார் ஓராண்டு ஒன்றாக வசித்து வந்ததாக அவர் தெரிவித்துள்ளார்.

இந்த நிலையில் முத்துலட்சுமி கர்ப்பமானதாக கூறப்படுகிறது. அப்போது கார்த்திக்கின் பெற்றோர் தன்னை தொடர்பு கொண்டு கருவைக் கலைத்துவிட்டு தங்களுடன் வந்து விடுமாறு வற்புறுத்தியதாக அவர் குற்றம்சாட்டியுள்ளார்.மேலும், கணவர் கார்த்திக் தன்னை கருக்கலைப்பு செய்ய வைத்துவிட்டு தனியாக விட்டுச் சென்றதாகவும், அவரை தொடர்பு கொண்டபோது கணவரின் பெற்றோர் கொலை மிரட்டல் விடுத்ததாகவும் முத்துலட்சுமி புகாரில் தெரிவித்துள்ளதாக கூறப்படுகிறது.

இதுதொடர்பாக அவர் குளித்தலை அனைத்து மகளிர் காவல் நிலையத்தில் புகார் அளித்துள்ளார். அதன் அடிப்படையில் கணவர் கார்த்திக் மற்றும் அவரது பெற்றோர் என 3 பேர் மீது வழக்குப்பதிவு செய்யப்பட்டுள்ளதாகவும், எஸ்.சி./எஸ்.டி. வன்கொடுமை தடுப்புச் சட்டத்தின் கீழும் வழக்கு பதிவு செய்யப்பட்டுள்ளதாகவும் தெரிவிக்கப்பட்டுள்ளது.

எனினும் வழக்குப்பதிவு செய்யப்பட்டும் இதுவரை கைது நடவடிக்கை எடுக்கப்படவில்லை என முத்துலட்சுமி குற்றம்சாட்டியுள்ளார். இதையடுத்து தனது வழக்கறிஞருடன் கரூர் மாவட்ட ஆட்சியரை சந்தித்து மனு அளித்த அவர், கணவர் மற்றும் அவரது பெற்றோர் மீது உரிய நடவடிக்கை எடுக்க வேண்டும் என்றும், தனக்கு பாதுகாப்பு வழங்க வேண்டும் என்றும் கோரிக்கை விடுத்துள்ளார்.இந்த புகார் தொடர்பாக போலீசார் விசாரணை நடத்தி வரும் நிலையில், குற்றச்சாட்டுகள் விசாரணையின் முடிவிலேயே உறுதி செய்யப்பட வேண்டும்.