வெறுப்புகளைத் தாண்டிய வெற்றி...  கீர்த்தி சுரேஷ் விஜய்க்கு வாழ்த்து!  

தமிழக சட்டமன்றத் தேர்தலில் தமிழக வெற்றிக் கழகம் ஈட்டியுள்ள பிரம்மாண்ட வெற்றியைத் தொடர்ந்து, அக்கட்சியின் தலைவர் விஜய்க்குத் திரையுலகினர் பலரும் தங்களது வாழ்த்துகளைத் தெரிவித்து வருகின்றனர். அந்த வகையில், விஜய்யுடன் பல படங்களில் இணைந்து நடித்த நடிகை கீர்த்தி சுரேஷ், தனது சமூக வலைதளப் பக்கத்தில் பதிவிட்டுள்ள வாழ்த்துச் செய்தி ரசிகர்களிடையே பெரும் நெகிழ்ச்சியை ஏற்படுத்தியுள்ளது. விஜய்யின் இந்த அரசியல் வெற்றியை அவரது விடாமுயற்சிக்குக் கிடைத்த அங்கீகாரமாக அவர் குறிப்பிட்டுள்ளார்.

கீர்த்தி சுரேஷ் வெளியிட்டுள்ள பதிவில், "அனைவரும் உங்களை நேசிப்பதால் மட்டுமல்ல, பல வெறுப்புகளையும் கடந்துதான் நீங்கள் இந்த இடத்திற்கு வந்திருக்கிறீர்கள். இந்த வெற்றி உங்களின் கடின உழைப்பு, அர்ப்பணிப்பு மற்றும் மக்கள் மீது நீங்கள் கொண்டுள்ள அளப்பரிய நேசத்தால் கிடைத்தது" எனப் பாராட்டியுள்ளார். விஜய்யின் அரசியல் வருகையின் போது எழுந்த விமர்சனங்களையும், அதனை அவர் எதிர்கொண்ட விதத்தையும் சுட்டிக்காட்டும் வகையில் கீர்த்தியின் இந்த பதிவு அமைந்துள்ளது.

விஜய்யின் வெற்றியைத் தமிழகம் முழுவதும் உள்ள அவரது ரசிகர்கள் கொண்டாடி வரும் வேளையில், சக நடிகையான கீர்த்தி சுரேஷின் இந்தப் பதிவு வைரலாகி வருகிறது. குறிப்பாக, அரசியலில் ஒரு புதிய மாற்றத்தை ஏற்படுத்தத் துடிக்கும் விஜய்யின் கரங்களை வலுப்படுத்தும் விதமாகத் திரையுலகினரின் ஆதரவு பெருகி வருவது குறிப்பிடத்தக்கது. மக்களின் நம்பிக்கையைப் பெற்றுள்ள விஜய், விரைவில் முதலமைச்சராகப் பொறுப்பேற்க உள்ள நிலையில், கீர்த்தி சுரேஷின் இந்த வாழ்த்து தவெக தொண்டர்களுக்கு உற்சாகத்தை அளித்துள்ளது.