மு.க.ஸ்டாலின் தந்தது சிறந்த நல்லாட்சி... நேரில் பாராட்டிய கெஜ்ரிவால்!

திமுக தலைமையிலான கூட்டணிக்கு ஆதரவாகத் தேர்தல் பிரச்சாரம் செய்வதற்காக ஆம் ஆத்மி கட்சியின் ஒருங்கிணைப்பாளர் அரவிந்த் கெஜ்ரிவால் இன்று சென்னை வருகை தந்தார். சென்னை வந்த அவர், தமிழக முதலமைச்சர் மு.க.ஸ்டாலினை நேரில் சந்தித்துப் பேசினார். இந்தச் சந்திப்பின் போது இரு மாநில அரசியல் நிலவரங்கள் மற்றும் தேர்தல் களம் குறித்து விரிவாக ஆலோசனை நடத்தப்பட்டதாகத் தெரிகிறது. சந்திப்பிற்குப் பிறகு தனது எக்ஸ் (X) தளத்தில் முதலமைச்சர் மு.க.ஸ்டாலினை வெகுவாகப் பாராட்டி கெஜ்ரிவால் பதிவிட்டுள்ளார்.

அந்தப் பதிவில், "தமிழ்நாட்டின் முதலமைச்சர் மு.க.ஸ்டாலினை சந்தித்ததில் பெருமை கொள்கிறேன். கல்வி, சுகாதாரம் மற்றும் மகளிர் அதிகாரம் ஆகிய துறைகளில் எங்களிடம் பொதுவான தொலைநோக்கு பார்வை உள்ளது. நாங்கள் எப்போதும் இது குறித்த கருத்துக்களை ஒருவருக்கொருவர் பரிமாறிக் கொள்கிறோம்," எனக் குறிப்பிட்டுள்ளார். மேலும், தமிழக மக்களின் வாழ்க்கைத் தரத்தை உயர்த்துவதில் மு.க.ஸ்டாலினின் அர்ப்பணிப்புமிக்க நல்லாட்சி மிகப்பெரிய தாக்கத்தை ஏற்படுத்தியுள்ளதாகவும், அதனைத் தான் பெரிதும் பாராட்டுவதாகவும் அவர் தெரிவித்துள்ளார்.

கெஜ்ரிவாலின் இந்த சென்னை வருகை மற்றும் ஸ்டாலினுடனான சந்திப்பு, தேசிய அளவில் 'இந்தியா' கூட்டணிக்கு மேலும் வலுசேர்ப்பதாகக் கருதப்படுகிறது. டெல்லியில் ஆம் ஆத்மி அரசு செயல்படுத்தி வரும் கல்வி மற்றும் சுகாதாரத் திட்டங்களைப் போன்றே, தமிழகத்திலும் பல முன்னோடித் திட்டங்கள் செயல்படுத்தப்பட்டு வருவதை கெஜ்ரிவால் சுட்டிக்காட்டியது அரசியல் வட்டாரத்தில் கவனத்தை ஈர்த்துள்ளது. முதல்வரின் நல்லாட்சிக்குக் கிடைத்துள்ள இந்தச் சர்வதேச அளவிலான அங்கீகாரம் திமுக தொண்டர்களிடையே பெரும் உற்சாகத்தை ஏற்படுத்தியுள்ளது.