கோவை சிறுமி கொலை வழக்கு...  ஜூன்  5 வரை நீதிமன்ற காவல்! 

கோவை மாவட்டம் சூலூர் அருகே பத்து வயது சிறுமி கடத்தப்பட்டு கொடூரமான முறையில் பாலியல் வன்கொடுமை செய்யப்பட்டு கொலை செய்யப்பட்ட சம்பவம் ஒட்டுமொத்த தமிழகத்தையும் உலுக்கியுள்ளது. இந்த நெஞ்சைப் பதறவைக்கும் கொடூரமான குற்றச் செயல் தொடர்பாகத் தனிப்படை போலீசாரால் கார்த்திக் மற்றும் மோகன்ராஜ் ஆகிய இரண்டு முக்கியக் குற்றவாளிகள் ஏற்கனவே அதிரடியாகக் கைது செய்யப்பட்டுள்ளனர்.

இவர்களில் முக்கியக் குற்றவாளியான கார்த்திக் என்பவரைக் காவல்துறையினர் கைது செய்ய முயன்றபோது, அவர் தப்பியோட முயன்று கீழே விழுந்ததில் அவரது காலில் பலத்த எலும்பு முறிவு ஏற்பட்டது. இதன் காரணமாக அவர் தற்போதும் கோவை அரசு மருத்துவக் கல்லூரி மருத்துவமனையில் பலத்த போலீஸ் பாதுகாப்புடன் உள்நோயாளியாக அனுமதிக்கப்பட்டுத் தீவிர சிகிச்சைப் பெற்று வருகிறார்.

அவருக்கு ஏற்பட்டுள்ள உடல்நலக் பாதிப்பு காரணமாக அவரை வழக்கம்போல் நீதிமன்றத்திற்கு நேரில் அழைத்துச் சென்று ஆஜர்படுத்த முடியாத அசாதாரணச் சூழல் நிலவியது. இதனால், இந்த விவகாரத்தைக் கையில் எடுத்த போக்சோ நீதிமன்ற நீதிபதி பகவதி அம்மாள் அவர்கள், எவ்வித தாமதமும் இன்றித் தானே நேரடியாகக் கோவை அரசு மருத்துவமனைக்குச் சென்று குற்றவாளியை ஆய்வு செய்ததுடன், கார்த்திக்கை வரும் ஜூன் 5 ஆம் தேதி வரை நீதிமன்றக் காவலில் வைக்க அதிரடியாக உத்தரவிட்டுள்ளார்.