தஞ்சாவூர் மாவட்டத்தைப் பிரித்துக் கும்பகோணத்தைத் தனி மாவட்டமாக அறிவிப்பதற்கான அனைத்து முயற்சிகளையும் அரசு மேற்கொண்டு வருவதாகவும், இது குறித்த அதிகாரப்பூர்வ அறிவிப்பைக் கூடிய விரைவில் முதலமைச்சர் விஜய் வெளியிடுவார் என்றும் மாநில வேளாண்மை மற்றும் உழவர் நலத்துறை அமைச்சர் ஆர். வினோத் தெரிவித்துள்ளார்.

கும்பகோணம் மற்றும் அதனைச் சுற்றியுள்ள பகுதி மக்களின் பல ஆண்டுகால முதன்மையான கோரிக்கையாகக் கும்பகோணத்தைத் தலைமையிடமாகக் கொண்டு தனி மாவட்டம் உருவாக்கப்பட வேண்டும் என்பது இருந்து வருகிறது. புவியியல் ரீதியாகவும், மக்கள் தொகை அடிப்படையிலும் பெரிய மாவட்டமாகத் தஞ்சாவூர் இருப்பதால், பொதுமக்கள் தங்களின் பல்வேறு நிர்வாகத் தேவைகளுக்காகத் தஞ்சாவூர் மாவட்டத் தலைமையகத்திற்கு நீண்ட தூரம் பயணிக்க வேண்டிய சூழல் உள்ளது.

இந்நிலையில், கும்பகோணம் தொகுதி சட்டமன்ற உறுப்பினரும், மாநில வேளாண்மைத் துறை அமைச்சருமான ஆர். வினோத், கும்பகோணம் பகுதியில் நடைபெற்று வரும் பல்வேறு தூர்வாரும் பணிகள் மற்றும் நெல் கொள்முதல் நிலையங்களை நேரில் ஆய்வு செய்தார்.

ஆய்வின் போது செய்தியாளர்களைச் சந்தித்த அமைச்சர் ஆர். வினோத், "கும்பகோணம் பகுதி மக்களின் நீண்ட நாள் கனவான தனி மாவட்டக் கோரிக்கை ஆளுங்கட்சியின் கவனத்திற்குத் தீவிரமாகக் கொண்டு செல்லப்பட்டுள்ளது. கும்பகோணத்தைத் தனி மாவட்டமாக அறிவிப்பதற்கான அனைத்து கட்டமைப்பு மற்றும் நிர்வாக ரீதியான பூர்வாங்க முயற்சிகளை அரசு தற்போது அதிவேகமாக மேற்கொண்டு வருகிறது. மக்களின் இந்த எதிர்பார்ப்பை நிறைவேற்றும் வகையில், முதலமைச்சர் விஜய் இதற்கான அதிகாரப்பூர்வ அறிவிப்பை மிக விரைவில் வெளியிடுவார்" என்று உறுதியளித்தார்.

தொடர்ந்து கும்பகோணத்தின் உள்கட்டமைப்பு மற்றும் போக்குவரத்துப் போக்குவரத்து நெரிசல் குறித்துப் பேசிய அமைச்சர், "கும்பகோணம் நகரின் போக்குவரத்துப் நெரிசலைக் குறைப்பதற்காகத் திட்டமிடப்பட்டு, இன்னும் தொடங்கப்படாமல் முடங்கிக் கிடக்கும் 3-ஆம் கட்டச் சுற்றுச்சாலை அமைக்கும் பணியை விரைந்து தொடங்குவதற்கும், அதற்கான நிதி ஒதுக்கீடுகளைப் பெறுவதற்கும் உரிய நடவடிக்கைகள் போர்க்கால அடிப்படையில் எடுக்கப்படும்" என்று கூறினார்.