தமிழக முதலமைச்சர் விஜய்யைச் சட்டமன்றச் செயல்பாடுகள் மற்றும் பழைய சினிமா விவகாரங்களை ஒப்பிட்டு அவதூறாகப் பேசியதாக, அதிமுக முன்னாள் அமைச்சர் செல்லூர் ராஜுவைக் கைது செய்யக் கோரி தவெக வழக்கறிஞர்கள் அணி சார்பில் மாநகர காவல் ஆணையரிடம் புகார் மனு அளிக்கப்பட்டுள்ளது.

சமீபத்தில் செய்தியாளர்களைச் சந்தித்த அதிமுக மூத்த தலைவரும், முன்னாள் அமைச்சருமான செல்லூர் ராஜு, தற்போதைய தவெக அரசின் சட்டமன்ற நடவடிக்கைகள் மற்றும் முதலமைச்சர் விஜய்யின் உரைகள் குறித்துக் கடுமையான விமர்சனங்களை முன்வைத்திருந்தார்.

"தமிழகச் சட்டமன்றத்தில் முதலமைச்சர் விஜய் நாகரீகமற்று, ஏதோ ஒரு சந்தைக்கடை போலப் பேசி வருகிறார். கடந்த காலங்களில் அவர் நடித்த 'புலி' திரைப்பட விவகாரத்தின் போது, வரி ஏய்ப்பு செய்து அதற்காக அபராதம் கட்டிய ஒருவருக்கு, மற்ற அரசியல் தலைவர்களைப் பற்றியோ அல்லது அவர்களின் யோக்கியதையைப் பற்றியோ விமர்சிப்பதற்கு என்ன தகுதி இருக்கிறது?" என்று செல்லூர் ராஜு அண்மையில் கேள்வி எழுப்பியிருந்தது அரசியல் வட்டாரத்தில் பெரும் விவாதத்தைக் கிளப்பியது.

முதலமைச்சர் விஜய்யின் தனிப்பட்ட நற்பெயருக்குக் களங்கம் விளைவிக்கும் வகையிலும், அவதூறு பரப்பும் நோக்கிலும் முன்னாள் அமைச்சர் செல்லூர் ராஜு பேசியுள்ளதாகத் தவெக தரப்பில் கடும் கண்டனங்கள் எழுந்தன.

இதனைத் தொடர்ந்து, தவெக வழக்கறிஞர்கள் அணியைச் சேர்ந்த நிர்வாகிகள் இன்று மாநகர காவல் ஆணையரை நேரில் சந்தித்துப் புகார் மனு ஒன்றை அளித்தனர். அந்த மனுவில், நாட்டின் மிக உயரிய பதவியில் இருக்கும் தமிழக முதலமைச்சரைப் பொதுவெளியில் அவதூறான வார்த்தைகளால் விமர்சித்த முன்னாள் அமைச்சர் செல்லூர் ராஜு மீது சட்டப்படியான வழக்குப் பதிவு செய்து, அவரை உடனடியாகக் கைது செய்ய வேண்டும் என்று வலியுறுத்தியுள்ளனர்.

மாநிலத்தில் தவெக ஆட்சிப் பொறுப்பேற்றது முதலே அதிமுக மற்றும் தவெக நிர்வாகிகளுக்கு இடையே பல்வேறு விவகாரங்களில் வார்த்தைப் போர்கள் முற்றியுள்ள நிலையில், தற்பொழுது முன்னாள் அமைச்சர் செல்லூர் ராஜுவுக்கு எதிராகக் காவல் துறையில் தவெக வழக்கறிஞர்கள் புகார் அளித்திருப்பது தமிழக அரசியலில் மேலும் பரபரப்பைக் கூட்டியுள்ளது.