தமிழ்நாடு பாடநூல் மற்றும் கல்வியியல் பணிகள் கழகத்தின் புதிய தலைவராக தவெக முக்கிய நிர்வாகியான லயோலா மணி  நியமிக்கப்பட்டுள்ளார். தமிழகத்தில் ஆட்சி மாற்றம் ஏற்பட்டுத் தவெக அரசு பொறுப்பேற்றதைத் தொடர்ந்து, பல்வேறு அரசுத் துறை வாரியங்களின் தலைவர்கள் மாற்றப்பட்டு வரும் வேளையில் இந்த முக்கிய நியமனம் அறிவிக்கப்பட்டுள்ளது.

சென்னை தலைமைச் செயலகத்தில் நடைபெற்ற நிகழ்வின் போது, தமிழகப் பள்ளிக்கல்வித்துறை அமைச்சர் ராஜ்மோகன் முன்னிலையில், முதலமைச்சர் விஜய் அவர்களிடம் இருந்து புதிய பொறுப்பிற்கான நியமன ஆணையை லயோலா மணி முறைப்படி பெற்றுக் கொண்டார்.

தமிழ்நாடு பாடநூல் மற்றும் கல்வியியல் பணிகள் கழகத் தலைவராக நியமிக்கப்பட்டுள்ள லயோலா மணி, இப்பதவியில் அடுத்த 3 ஆண்டுகள் நீடிப்பார் எனத் தமிழக அரசு வெளியிட்டுள்ள அதிகாரப்பூர்வ அரசாணையில் தெரிவிக்கப்பட்டுள்ளது.

கடந்த திமுக ஆட்சிக் காலத்தில் இந்த பதவியில் பிரபல பட்டிமன்ற நடுவரும் திமுக நிர்வாகியுமான திண்டுக்கல் லியோனி இருந்தார் என்பது குறிப்பிடத்தக்கது. தமிழ்நாடு பாடநூல் மற்றும் கல்வியியல் பணிகள் கழகம் என்பது தமிழக அரசின் பள்ளிக்கல்வித்துறையின் கீழ் இயங்கும் ஒரு மிக முக்கியப் பிரிவாகும். தமிழகத்தில் உள்ள அரசு மற்றும் அரசு உதவி பெறும் பள்ளிகளில் பயிலும் மாணவர்களுக்கான பாடப்புத்தகங்களை அச்சிடுதல், தரம் உயர்த்துதல் மற்றும் விலையில்லாப் பொருட்கள் (சீருடைகள், காலணிகள், புத்தகப் பைகள்) விநியோகத்தைக் கண்காணிப்பது போன்ற முக்கியப் பணிகள் இந்த வாரியத்தின் மூலமாகவே திட்டமிடப்பட்டுச் செயல்படுத்தப்படுகின்றன.

புதிய தலைவராகப் பொறுப்பேற்கவுள்ள லயோலா மணி, பள்ளிக் கல்வித் திட்டங்களில் புதிய சீர்திருத்தங்கள் மற்றும் மாணவர்களுக்கான நலத்திட்டங்களை விரைந்து கொண்டு சேர்ப்பதில் முக்கியப் பங்காற்றுவார் என எதிர்பார்க்கப்படுகிறது. புதிய தலைவராக நியமிக்கப்பட்டுள்ள அவருக்குத் தவெக நிர்வாகிகள் மற்றும் திரையுலகைச் சார்ந்த பிரபலங்கள் பலரும் தங்களது வாழ்த்துகளைத் தெரிவித்து வருகின்றனர்.