சர்ச்சைக்கு முற்றுப்புள்ளி ... மகனுக்கு தந்தையாகப் பொறுப்பேற்ற மாதம்பட்டி ரங்கராஜ்!

ஆடை வடிவமைப்பாளர் ஜாய் கிரிசில்டா மற்றும் பிரபல சமையல் கலைஞர் மாதம்பட்டி ரங்கராஜ் இடையே குழந்தை தொடர்பாக நீண்ட நாட்களாகச் சர்ச்சை நீடித்து வந்தது. இந்த விவகாரத்தில் நடத்தப்பட்ட மரபணுப் பரிசோதனையின் முடிவுகள் அண்மையில் வெளியாகிப் பெரும் பரபரப்பை ஏற்படுத்தின. அந்தப் பரிசோதனை முடிவுகளின் அடிப்படையில், குழந்தையின் தந்தை மாதம்பட்டி ரங்கராஜ் தான் என்பது சட்டப்பூர்வமாகச் சந்தேகமின்றி உறுதியானது. இந்தத் தகவல் சமூக வலைதளங்களிலும் ஊடகங்களிலும் பரவி அனைவரின் கவனத்தையும் ஈர்த்தது.

இந்தச் சூழலில் மாதம்பட்டி ரங்கராஜ் தரப்பில் இருந்து மிக முக்கியமான அறிக்கை ஒன்று முறைப்படி வெளியிடப்பட்டுள்ளது. அதில் தனது மகன் ராகாவிற்கு ஒரு தந்தையாகச் செய்ய வேண்டிய அனைத்துப் பொறுப்புகளையும் கடமைகளையும் தான் உணர்ந்துள்ளதாகக் குறிப்பிட்டுள்ளார். கடந்த 6 மாதங்களாகவே குழந்தைக்குத் தேவையான உதவிகளையும் பராமரிப்புகளையும் தொடர்ந்து செய்து வருவதாக  தெரிவித்துள்ளார். சட்டப்பூர்வ முடிவுகள் வெளியான நிலையில் தனது கடமையை அவர் வெளிப்படையாக ஏற்றுக்கொண்டுள்ளார்.

மேலும் அந்த அறிக்கையில், மகனின் எதிர்காலத்தைக் கருத்தில் கொண்டு அவனது வாழ்நாள் முழுவதும் ஒரு நல்ல தந்தையாகத் துணை நிற்பேன் என உறுதியளித்துள்ளார். குழந்தையின் வளர்ப்பு மற்றும் படிப்பு உள்ளிட்ட அனைத்துத் தேவைகளுக்கும் முழுப் பொறுப்பேற்றுச் செயல்படப் போவதாகவும் தெரிவித்துள்ளார். நீண்ட நாட்களாக நிலவி வந்த சர்ச்சைக்குப் பிறகு மாதம்பட்டி ரங்கராஜ் வெளியிட்டுள்ள இந்த அறிக்கை பொதுமக்கள் மத்தியில் பெரும் கவனத்தைப் பெற்றுள்ளது.