கடந்த சட்டமன்றத் தேர்தலில் சென்னை தியாகராய நகர் தொகுதியில் போட்டியிட்டு வெற்றி பெற்ற தமிழக வெற்றிக் கழக அரசின் அமைச்சர் என்.ஆனந்தின் வெற்றிக்கு எதிராகத் தொடரப்பட்ட வழக்கைச் சென்னை உயர் நீதிமன்றம் இன்று விசாரணைக்கு ஏற்றுக்கொண்டுள்ளது.

நடந்து முடிந்த சட்டமன்றத் தேர்தலில் தி.நகர் தொகுதியில் த.வெ.க. சார்பில் போட்டியிட்ட என்.ஆனந்த் வெற்றி பெற்று அமைச்சராகப் பொறுப்பேற்றார். இந்நிலையில், அவரது வெற்றியைச் செல்லாது என அறிவிக்கக் கோரி, அத்தொகுதியைச் சேர்ந்த வாக்காளரான பாலசுப்பிரமணிய சர்மா என்பவர் சென்னை உயர் நீதிமன்றத்தில் தேர்தல் வழக்கு ஒன்றைத் தாக்கல் செய்திருந்தார். அந்த மனுவில், தேர்தல் நடைமுறைகளில் விதிமீறல்கள் நடந்துள்ளதாகவும், எனவே அமைச்சர் என்.ஆனந்தின் வெற்றியை ரத்து செய்ய வேண்டும் என்றும் மனுதாரர் கோரியிருந்தார்.

இந்த மனு இன்று உயர் நீதிமன்றத்தில் முதற்கட்ட விசாரணைக்கு வந்தது. மனுவை முழுமையாகப் பரிசீலித்த நீதிபதிகள், இந்த வழக்கினை விசாரணைக்கு ஏற்பதாக அறிவித்தனர். மேலும், இந்தத் தேர்தல் வழக்கில் சுமத்தப்பட்டுள்ள குற்றச்சாட்டுகள் குறித்துத் தகுந்த விளக்கம் அளிக்கக் கோரி, த.வெ.க. அமைச்சர் என்.ஆனந்துக்கு நீதிமன்ற நோட்டீஸ் அனுப்ப நீதிபதிகள் அதிரடியாக உத்தரவிட்டனர்.

அமைச்சர் பதவி வகித்து வரும் ஒருவரின் தேர்தல் வெற்றிக்கு எதிராக உயர் நீதிமன்றம் நோட்டீஸ் அனுப்பியுள்ள இந்தச் சம்பவம், தமிழக அரசியல் மற்றும் த.வெ.க. வட்டாரத்தில் தற்பொழுது பெரும் சலசலப்பையும் பரபரப்பையும் ஏற்படுத்தியுள்ளது.