மதுரை தோப்பூரில் கட்டப்பட்டு வரும் எய்ம்ஸ் மருத்துவமனை எப்போது செயல்பாட்டுக்கு வரும் என்ற எதிர்பார்ப்பு நீடித்து வரும் நிலையில், இதுகுறித்து சென்னை உயர்நீதிமன்ற மதுரைக் கிளையில் ஒன்றிய அரசு முக்கிய தகவலை தெரிவித்துள்ளது.அதன்படி, மதுரை எய்ம்ஸ் மருத்துவமனை 2027 ஜனவரி 1-ம் தேதி முதல் செயல்படும் என ஒன்றிய அரசு நீதிமன்றத்தில் தெரிவித்துள்ளதாக கூறப்படுகிறது. முதற்கட்டமாக அன்றைய தினம் வெளிநோயாளிகள் பிரிவு (OPD) பொதுமக்களின் பயன்பாட்டுக்கு வரும் என்றும் தெரிவிக்கப்பட்டுள்ளது.

தோப்பூரில் நடைபெற்று வரும் மதுரை எய்ம்ஸ் மருத்துவமனை கட்டுமானப் பணிகள், ஆகஸ்ட் 31-ம் தேதி நிலவரப்படி 57 சதவீதம் நிறைவடைந்துள்ளதாக நீதிமன்றத்தில் ஒன்றிய அரசு தரப்பில் தெரிவிக்கப்பட்டுள்ளது.மதுரை எய்ம்ஸ் திட்டம் தொடர்பான அதிகாரப்பூர்வ தகவல்களின்படி, நிரந்தர வளாகம் தோப்பூரில் அமைக்கப்பட்டு வருகிறது. தற்போது எய்ம்ஸ் மதுரையின் நிர்வாக மற்றும் கல்வி நடவடிக்கைகள் தொடர்ந்து நடைபெற்று வருகின்றன.

பொதுமக்களுக்கு OPD சேவை எப்போது?

முதற்கட்டமாக 2027 ஜனவரி 1 முதல் OPD சேவையை தொடங்க திட்டமிடப்பட்டுள்ளதாக நீதிமன்றத்தில் தெரிவிக்கப்பட்டுள்ளதால், மதுரை மற்றும் தென் மாவட்டங்களைச் சேர்ந்த மக்கள் மத்தியில் இந்த அறிவிப்பு கவனம் பெற்றுள்ளது.

மருத்துவமனையின் முழுமையான கட்டமைப்பு மற்றும் அனைத்து மருத்துவ சேவைகளும் எந்த கட்டத்தில் தொடங்கும் என்பது அடுத்தடுத்த பணிகளின் முன்னேற்றத்தைப் பொறுத்திருக்கும்.