வேலூர் மாவட்டத்தில் குடும்ப உறவுகளுக்கிடையே ஏற்பட்ட தகராறில் கணவனே மனைவியைக் கொடூரமாகக் கொலை செய்து உடலை மறைத்த சம்பவம் வெளிச்சத்திற்கு வந்துள்ளது.

வேலூர் மாவட்டம் பேரணாம்பட்டு அருகே, மனைவியின் கள்ளக்காதல் விவகாரம் மற்றும் குடும்பத் தகராறு காரணமாக ஆத்திரமடைந்த கணவன் விஜயகுமார் (48), மனைவி தனலட்சுமியை (36) கொடூரமாகக் கொலை செய்து உடலை மறைத்துள்ளார்.

பேரணாம்பட்டு காவல் துறையினர் நடத்திய முதற்கட்ட விசாரணையில், இக்கொலைச் சம்பவத்தின் பின்னணி குறித்த திடுக்கிடும் தகவல்கள் வெளியாகியுள்ளன. கைதான விஜயகுமார் மற்றும் தனலட்சுமி தம்பதியினருக்குப் கடந்த 18 ஆண்டுகளுக்கு முன்பு திருமணம் நடைபெற்றுள்ளது. இவர்களுக்குக் குழந்தைகள் உள்ள சூழலில், கடந்த சில மாதங்களாகத் தனலட்சுமிக்கும் அதே பகுதியைச் சேர்ந்த குமரேசன் (25) என்ற வாலிபருக்கும் இடையே கள்ளத்தொடர்பு ஏற்பட்டதாகக் கூறப்படுகிறது.

மனைவியின் இந்த நடத்தையைக் கணவர் விஜயகுமார் பலமுறை கண்டித்துள்ளார். ஆனால், தனலட்சுமி தனது வழக்கத்தை மாற்றிக் கொள்ளாமல், தட்டிக்கேட்ட கணவனைப் பலமுறை தகாத வார்த்தைகளால் பேசி, மற்றவர்கள் முன்னிலையில் அவமானப்படுத்தியதாகத் தெரிகிறது.

சம்பவத்தன்று மனைவியின் கள்ளக்காதல் விவகாரம் தொடர்பாக இருவருக்கும் இடையே மீண்டும் கடுமையான வாக்குவாதம் முற்றியுள்ளது. இதில் அத்துமீறிப் பேசிய தனலட்சுமியின் செயலால் எல்லையற்ற ஆத்திரமடைந்த விஜயகுமார், வீட்டில் இருந்த அரிவாளை எடுத்துத் தனலட்சுமியைக் கொடூரமாக வெட்டிக் கொலை செய்துள்ளார்.

பின்னர், இக்கொலைச் சம்பவத்தை யாருக்கும் தெரியாமல் மறைப்பதற்காக, மனைவியின் உடலை ரகசியமாக எடுத்துச் சென்று ஆள் நடமாட்டம் இல்லாத பகுதியில் வீசி மறைத்துள்ளார்.

தனலட்சுமியைக் காணவில்லை என்று உறவினர்கள் கொடுத்த புகாரின் பேரில் பேரணாம்பட்டு போலீசார் வழக்குப் பதிவு செய்து தீவிர விசாரணை மேற்கொண்டு வந்தனர். சந்தேகத்தின் பேரில் விஜயகுமாரைப் பிடித்துப் போலீசார் தங்களது பாணியில் விசாரணை நடத்திய போது, அவர் முன்னுக்குப் பின் முரணாகப் பதிலளித்துள்ளார்.

தொடர் விசாரணையில், ஆத்திரத்தில் தனது மனைவியைக் கொலை செய்து உடலை மறைத்த அத்தனை உண்மைகளையும் விஜயகுமார் போலீசாரிடம் வாக்குமூலமாக ஒப்புக்கொண்டார். இதனையடுத்து, கொலை வழக்காக மாற்றிய போலீசார் விஜயகுமாரை முறைப்படி கைது செய்து, நீதிமன்றத்தில் ஆஜர்படுத்தி சிறையில் அடைத்துள்ளனர். இந்தத் துயரச் சம்பவம் பேரணாம்பட்டு பகுதியில் பெரும் பரபரப்பை ஏற்படுத்தியுள்ளது.