அதிமுக பொதுக்கூட்டத்தில் மயங்கிய நிலையில் ஒருவர்  பலி!

கடலூர் மாவட்டம் பண்ருட்டி அருகே நடைபெற்ற அதிமுக பொதுக்கூட்டத்தில் பங்கேற்ற தொண்டர் ஒருவர் திடீரென மயங்கி விழுந்து உயிரிழந்த சம்பவம் அப்பகுதியில் பெரும் சோகத்தை ஏற்படுத்தியுள்ளது. 

மறைந்த முன்னாள் முதல்வர் ஜெயலலிதாவின் 78-வது பிறந்தநாளை முன்னிட்டு, கடலூர் தெற்கு மாவட்ட அதிமுக சார்பில் பண்ருட்டி அருகே உள்ள காடாம்புலியூர் பகுதியில் பிரம்மாண்ட பொதுக்கூட்டம் நேற்று இரவு நடைபெற்றது. கடலூர் தெற்கு மாவட்டச் செயலாளர் சொரத்தூர் ராஜேந்திரன் தலைமையில் நடைபெற்ற இந்த விழாவில், அரசியல் உரைகளுக்கு முன்னதாக கலை நிகழ்ச்சிகள் நடைபெற்றன. இந்தப் பொதுக்கூட்டத்தில் பங்கேற்பதற்காகப் பணிகன்குப்பம் பகுதியைச் சேர்ந்த வேலு (52) என்ற அதிமுக தொண்டர் வந்திருந்தார்.

மேடையில் நடைபெற்ற ஆடல் பாடல் நிகழ்ச்சிகளை அவர் ரசித்துக் கொண்டிருந்த போது, திடீரென அமர்ந்திருந்த இருக்கையிலேயே மயங்கிச் சரிந்து விழுந்தார். உடனடியாக அருகில் இருந்தவர்கள் பதற்றமடைந்து அவரை உடனடியாக மீட்டுப் பண்ருட்டி அரசு மருத்துவமனைக்குக் கொண்டு சென்றனர். மருத்துவமனையில் வேலுவைப் பரிசோதித்த மருத்துவர்கள், அவர் கொண்டு வரும் வழியிலேயே உயிரிழந்துவிட்டதாகத் தெரிவித்தனர். முதற்கட்டத் தகவலின்படி, அவருக்கு ஏற்பட்ட திடீர் மாரடைப்பு மரணத்திற்குப் பிரதான காரணமாக இருக்கலாம் எனக் கூறப்படுகிறது.

இது குறித்துத் தகவல் அறிந்த காடாம்புலியூர் போலீசார், வேலுவின் உடலைக் கைப்பற்றிப் பிரேதப் பரிசோதனைக்காகக் கடலூர் அரசு மருத்துவமனைக்கு அனுப்பி வைத்துள்ளனர். இச்சம்பவம் குறித்து வழக்குப் பதிவு செய்யப்பட்டுத் தீவிர விசாரணை நடைபெற்று வருகிறது. தற்போது தமிழகத்தில் கோடை வெப்பம் அதிகரிக்கத் தொடங்கியுள்ள நிலையில், இது போன்ற திறந்தவெளி பொதுக்கூட்டங்களில் பங்கேற்கும் முதியவர்கள் மற்றும் நடுத்தர வயதுடையவர்கள் போதுமான நீர்ச்சத்துடனும், உடல்நலக் குறைபாடு இருந்தால் கூட்ட நெரிசலைத் தவிர்க்கவும் மருத்துவர்கள் அறிவுறுத்துகின்றனர்.