பயங்கரம்... 16 வயது சிறுமிக்குக் கட்டாயக் குழந்தை திருமணம் செய்த 55 வயது சித்தப்பா !

திருவள்ளூர் அருகே வசித்து வரும் 16 வயதுடைய மைனர் சிறுமி ஒருவருக்கு ஆசைவார்த்தைகளைக் கூறி, அந்தச் சிறுமியின் சொந்தச் சித்தப்பாவான 55 வயது சங்கர் என்பவர் ரகசியமாகக் குழந்தை திருமணம் செய்துள்ளார். பொன்னேரி பகுதியில் உள்ள ஒரு கோவிலில் வைத்து இந்த சட்டவிரோத திருமணத்தை நடத்திய அவர், யாருக்கும் சந்தேகம் வராதவாறு அங்கிருந்த ஒரு தனியார் அரிசி ஆலையில் அந்தச் சிறுமியுடன் தங்கித் தொடர்ந்து வேலை பார்த்து வந்துள்ளார்.

பாதிக்கப்பட்ட சிறுமி கொடுத்த ரகசியத் தகவலின் அடிப்படையில் சம்பவ இடத்திற்கு விரைந்து சென்ற திருவள்ளூர் மாவட்ட அனைத்து மகளிர் போலீசார், சிறுமியைப் பத்திரமாக மீட்டனர். மேலும் குழந்தை திருமணம் மற்றும் பாலியல் வன்கொடுமை தடுப்புச் சட்டங்களின் கீழ் வழக்குப் பதிவு செய்து, தப்பியோட முயன்ற சித்தப்பா சங்கரை வளைத்துப் பிடித்துக் கைது செய்தனர்.

போலீசார் நடத்திய தீவிர விசாரணையில், கைதான சங்கருக்கு ஏற்கனவே திருமணமாகி குழந்தைகள் மற்றும் பேரப்பிள்ளைகள் இருப்பது மிகத் தெளிவாகத் தெரியவந்துள்ளது. பேரப்பிள்ளைகள் இருக்கும் வயதில் 16 வயது சிறுமியை ஏமாற்றிக் கல்யாணம் செய்த சங்கரின் இந்தச் செயல் அந்தப் பகுதியில் கடுமையான அதிர்ச்சியை ஏற்படுத்தியுள்ளது. இச்சம்பவம் குறித்துப் போலீசார் தங்களின் மேல் விசாரணையைத் தீவிரமாக நடத்தி வருகின்றனர்.