இந்தியாவில் மருத்துவக் கழிவு அழிப்பு மையம் இல்லாத தொலைதூரப் பகுதிகளில் கழிவுகளைப் பூமிக்கடியில் ஆழமாகப் புதைக்க அனுமதி வழங்கப்பட்டுள்ளது. இம்முறையைப் பயன்படுத்தும் 9,178 மருத்துவமனைகளில் 5,715 மையங்கள் மட்டுமே உரிய விதிமுறைகளைப் பின்பற்றுவதாக மத்திய மாசுக்கட்டுப்பாட்டு வாரியம் கண்டறிந்துள்ளது. இதனால் நாட்டின் பல்வேறு பகுதிகளில் நிலத்தடி நீர் மற்றும் சுற்றுச்சூழல் பாதுகாப்பு கடுமையாகப் பாதிக்கப்படும் அபாயம் ஏற்பட்டுள்ளது.

குறிப்பாகக் கழிவுக் குழிக்குக் கீழே குறைந்தபட்சம் 6 மீட்டர் நிலத்தடி நீர்மட்டம் இருக்க வேண்டும் என்ற முக்கியமான விதியை 477 மருத்துவ மையங்கள் முற்றிலுமாக மீறியுள்ளன. மேலும் இது போன்ற பல மையங்கள் உரிய அரசின் அனுமதியின்றிச் செயல்பட்டு வருவதுடன் விதிமுறைகளைக் காற்றில் பறக்க விட்டுள்ளன. இது தொடர்பான விரிவான ஆய்வறிக்கை தேசிய பசுமை தீர்ப்பாயத்தில் அதிகாரப்பூர்வமாகத் தாக்கல் செய்யப்பட்டுள்ளது.

இந்த முறைகேடுகள் குறித்து விசாரித்த தேசிய பசுமை தீர்ப்பாயம் 8 வாரங்களுக்குள் முறையான நடவடிக்கை எடுக்காவிட்டால் கடும் நடவடிக்கை எடுக்கப்படும் என 17 மாநிலங்களை எச்சரித்துள்ளது. சுற்றுச்சூழல் பாதுகாப்புச் சட்டத்தின் கீழ் கடுமையான தண்டனைகள் வழங்கப்படலாம் என்பதால் சம்மந்தப்பட்ட மாநில அரசுகள் துரிதமான நடவடிக்கைகளில் இறங்கியுள்ளன. மருத்துவக் கழிவுகளைக் கையாள்வதில் நிலவும் இந்த அலட்சியப் போக்கு பொதுமக்கள் மத்தியில் பெரும் அதிர்ச்சியை ஏற்படுத்தியுள்ளது.