விருச்சிகத்தில் நுழையும் புதன்... டிசம்பரில் இந்த 3 ராசிக்காரர்களுக்கு வீடு, மனை யோகம் - தொட்டதெல்லாம் துலங்கும்!

 

ஜோதிட சாஸ்திரத்தில் புத்தி, பேச்சு, கல்வி, வணிகம் மற்றும் பகுத்தறிவின் அதிபதியாகக் கருதப்படும் புதன் பகவான், வரும் டிசம்பர் மாதம் விருச்சிக ராசிக்குள் பிரவேசிக்க உள்ளார். இந்தக் கிரகப் பெயர்ச்சி ஆழமான சிந்தனை, ஆராய்ச்சித் திறன் மற்றும் தெளிவான தகவல் பரிமாற்றத்தை உருவாக்கும் காலமாகக் கணிக்கப்பட்டுள்ளது. இதில் குறிப்பாக மேஷம், கடகம் மற்றும் துலாம் ஆகிய 3 ராசிக்காரர்களுக்குச் சிறப்பான முன்னேற்றமும் சாதகமான சூழலும் உருவாக வாய்ப்புள்ளதாகக் கூறப்படுகிறது.

டிசம்பர் 2-ம் தேதி மாலை 5.20 மணிக்கு புதன் விருச்சிக ராசிக்குள் நுழைகிறார். விருச்சிக ராசியில் புதன் சஞ்சரிக்கும் இந்தக் காலகட்டம், உணர்திறன் மிக்க விஷயங்களைக் கையாளும் பக்குவத்தையும், மறைந்திருக்கும் நுணுக்கங்களைப் புரிந்து கொள்ளும் திறனையும் வழங்கும் எனக் கருதப்படுகிறது.

1. மேஷம்: மேஷ ராசிக்கு இந்தப் பெயர்ச்சி சாதகமான பலன்களைத் தரும் வகையில் அமைகிறது. நிதி நிலையில் நல்ல முன்னேற்றம் காணப்படும்; நீண்ட நாட்களாக நிலுவையில் இருந்த பணிகள் நிறைவடையும். பணியிடத்தில் பதவி உயர்வு அல்லது ஊதிய உயர்வுக்கான வாய்ப்புகள் உருவாகலாம். வியாபாரத்தில் ஈடுபட்டுள்ளோர் கடின உழைப்பால் தொழிலை விரிவுபடுத்தும் சூழல் அமையும். குடும்பத்தினருடன் மகிழ்ச்சியாக நேரத்தைச் செலவிட முடியும். சொத்து மற்றும் வாரிசுரிமை சார்ந்த விஷயங்களிலும், கூட்டு நிதி முயற்சிகளிலும் கவனத்துடன் செயல்பட்டுப் பலன் பெறலாம். புதிய சொத்து வாங்கும் யோகமும் தென்படுகிறது.

2. கடகம்: கடக ராசிக்காரர்களுக்குத் தடையாக இருந்த விஷயங்கள் விலகி, முன்னேற்றத்திற்கான பாதை திறக்கும். முன்பு இருந்த உடல்நலக் குறைவுகளில் நிவாரணம் கிடைக்கும். புதிய தொழில் தொடங்குவதற்கும், வேலை தேடுபவர்களுக்கும் சாதகமான வாய்ப்புகள் அமையக்கூடும். வெளிநாட்டுப் பயணத்திற்கான வாய்ப்பும் கைகூடலாம். குடும்பத்தில் அமைதியும் மகிழ்ச்சியும் நிலவும். திருமணமான தம்பதிகளிடையே புரிதலும் நெருக்கமும் அதிகரிக்கும். புதிய வாகனம் அல்லது சொத்து வாங்கும் முயற்சிகளும் சாதகமாக அமையலாம்.

3. துலாம் : துலாம் ராசிக்காரர்களுக்குப் பேச்சாற்றல் மற்றும் நினைவாற்றல் சிறப்பாக வெளிப்படும் காலகட்டமாக இது இருக்கும். மற்றவர்களை எளிதில் கவரும் வகையில் பேசும் திறனால் அலுவலகத்திலும் சமூகத்திலும் மதிப்பும் செல்வாக்கும் உயரும். வருமானம் மற்றும் சேமிப்பை உயர்த்துவதற்கான வாய்ப்புகள் கிடைக்கும். வர்த்தகத்தில் புதிய ஒப்பந்தங்கள் மூலம் லாபம் காணலாம். முன்பு கொடுத்த கடன் தொகை திரும்பக் கிடைப்பதற்கான சூழலும், திட்டமிட்ட முதலீடுகளில் பலன் பெறும் வாய்ப்பும் உருவாகும்.