இனி வீக் எண்ட்டில்  கனிமவள வாகனங்களுக்கு  தடை !

தென்காசி மாவட்டத்தில் வார இறுதி நாட்களான சனி மற்றும் ஞாயிற்றுக்கிழமைகளில் கனிமவள வாகனங்களை இயக்கத் தடை விதிக்கப்பட்டுள்ளது. தமிழகம் மற்றும் கேரளா எல்லைப் பகுதியான புளியரையில் தினமும் தீவிரப் போக்குவரத்து நெரிசல் ஏற்பட்டு வருகிறது. இதனைக் கருத்தில் கொண்டு, பொதுமக்களின் சிரமத்தைக் குறைக்கும் வகையில் இந்த புதிய தடை உத்தரவை மாவட்ட நிர்வாகம் பிறப்பித்துள்ளது. தடையை மீறி சனி மற்றும் ஞாயிற்றுக்கிழமைகளில் கனிமவள வாகனங்களை இயக்கினால் கடுமையான நடவடிக்கைகள் பாயும் என நிர்வாகம் எச்சரிக்கை விடுத்துள்ளது.

புளியரை எல்லைப் பகுதியில் நிலவும் கடுமையான போக்குவரத்து நெரிசலால் வாகன ஓட்டிகளும் உள்ளூர் மக்களும் தினமும் சொல்லொணாத் துயரத்திற்கு ஆளாகி வந்தனர். இந்தச் சூழலுக்கு முற்றுப்புள்ளி வைக்கும் வகையில் கனிமவள வாகனங்களின் இயக்கத்தைக் கட்டுப்படுத்த வேண்டும் எனக் கோரிக்கைகள் வலுத்தன. இதற்காகச் சமூக ஆர்வலர்கள், பொதுமக்கள் மற்றும் பல்வேறு அரசியல் கட்சியினர் தொடர்ந்து பல போராட்டங்களை முன்னெடுத்து வந்தனர். மக்களின் தொடர் போராட்டங்கள் மற்றும் எதிர்ப்புகளின் விளைவாகவே மாவட்ட நிர்வாகம் இந்த  உத்தரவை வெளியிட்டுள்ளது.

மாவட்ட நிர்வாகம் பிறப்பித்துள்ள இந்த புதிய உத்தரவு அப்பகுதி மக்கள் மற்றும் சமூக ஆர்வலர்கள் மத்தியில் பெரும் வரவேற்பைப் பெற்றுள்ளது. வார இறுதி நாட்களில் கனிமவள வாகனங்களின் இயக்கம் நிறுத்தப்படுவதால் புளியரை பகுதியில் போக்குவரத்து நெரிசல் கணிசமாகக் குறையும் என எதிர்பார்க்கப்படுகிறது. விதிமுறைகளை மீறும் லாரிகள் மற்றும் வாகனங்களைப் பறிமுதல் செய்து உரிய அபராதம் விதிக்கச் சோதனைச் சாவடிகளில் கண்காணிப்பு தீவிரப்படுத்தப்பட்டுள்ளது.