விருதுநகரில் நடைபெற்ற அரசுப் பொது நிகழ்ச்சியில் கலந்துகொண்ட அமைச்சர் கே. ஜெகதீஸ்வரிக்குத் திடீரென உடல்நலக்குறைவு ஏற்பட்டு,  அவசர அவசரமாக மருத்துவமனைக்கு அழைத்துச் செல்லப்பட்ட சம்பவம் அக்கட்சியினர், அதிகாரிகள் மத்தியில் பரபரப்பை ஏற்படுத்தியுள்ளது.

அண்மையில் நடந்து முடிந்த சட்டமன்றத் தேர்தலில் இராஜபாளையம் தொகுதியிலிருந்து தேர்ந்தெடுக்கப்பட்டு, தவெக அமைச்சரவையில் பொறுப்பேற்ற ஜெகதீஸ்வரி, இன்று காலை விருதுநகரில் நடைபெற்ற சிலம்ப வீரர் மற்றும் வீராங்கனைகளுக்கான அரசுப் பரிசளிப்பு விழாவில் முதன்மை விருந்தினராகப் பங்கேற்றிருந்தார்.

விழா மேடையில் வைக்கப்பட்டிருந்த அதிகாரப்பூர்வப் பேனரில், தனது பெயருக்கு மேலே மற்றொரு தவெக அமைச்சரான கீர்த்தனாவின் பெயர் இடம்பெற்றிருந்தது குறித்து மாவட்ட ஆட்சியர் மற்றும் அதிகாரிகளிடம் அமைச்சர் ஜெகதீஸ்வரி அதிருப்தியை வெளிப்படுத்தி வாக்குவாதத்தில் ஈடுபட்டதாகத் தெரிகிறது.

இந்த பரபரப்பான சூழ்நிலைக்கு மத்தியில், மேடையிலேயே அமைச்சர் ஜெகதீஸ்வரிக்குத் திடீரென கடுமையான அசுவாசமும், தலைசுற்றலும் ஏற்பட்டுள்ளது. இதனால் அவர் நிலைதடுமாறி மயக்கமடையும் நிலைக்குச் சென்றுள்ளார். அமைச்சருக்கு அசுவாசம் ஏற்பட்டதை உடனடியாகக் கவனித்த பாதுகாப்புப் போலீசார் மற்றும் அதிகாரிகள், அவரைத் தாங்கிப் பிடித்து விழா மேடையிலிருந்து கீழே அழைத்து வந்தனர்.

நிகழ்ச்சி நிரல்கள் உடனடியாக நிறுத்தப்பட்டு, அங்கிருந்த அமைச்சரின் அதிகாரப்பூர்வ அரசு வாகனத்திலேயே ஏற்றப்பட்டு, விருதுநகரில் உள்ள முன்னணி தனியார் மருத்துவமனைக்கு அவசரமாக அழைத்துச் செல்லப்பட்டார். அங்கு அவரைப் பரிசோதித்த மருத்துவக் குழுவினர், அமைச்சருக்கு திடீரென ஏற்பட்ட 'இரத்த சர்க்கரை அளவு அதிகரிப்பின்' காரணமாகவே மயக்கம் ஏற்பட்டுள்ளதாகத் தெரிவித்துள்ளனர். தற்போது அவருக்குத் தேவையான குளுக்கோஸ் மற்றும் மருத்துவச் சிகிச்சைகள் அளிக்கப்பட்டு, மருத்துவர்களின் தீவிர கண்காணிப்பில் அவர் ஓய்வெடுத்து வருகிறார்.