ஈரோடு மாவட்டம் அந்தியூர் அருகே பள்ளிக்குச் செல்வதாகக் கூறி வீட்டை விட்டுச் சென்று மாயமான 13 வயது சிறுமியைத் தனிப்படை காவல்துறையினர் சத்தியமங்கலத்தில் பத்திரமாக மீட்டுள்ளனர்.

ஈரோடு மாவட்டக் காவல் கண்காணிப்பாளர் இது குறித்துத் தெரிவிக்கையில், சிறுமியை அவரது தாயார் திட்டியதால் ஆத்திரமடைந்த மாணவி, வழக்கம்போல் பள்ளிக்குச் செல்லாமல் கோபித்துக் கொண்டு தனது சொந்த ஊரான கர்நாடக மாநிலம் சென்னபட்னாவுக்குப் பேருந்தில் தனியாகப் புறப்பட்டுச் சென்றுள்ளார்.

சிறுமி மாலை வரை வீட்டிற்குத் திரும்பாததால் அதிர்ச்சியடைந்த பெற்றோர், உடனடியாகக் காவல்துறையில் புகார் அளித்தனர். புகாரின் பேரில் வழக்குப் பதிவு செய்த காவல்துறையினர், பேருந்து நிலையங்கள் மற்றும் சோதனைச் சாவடிகளில் தீவிரத் தேடுதல் வேட்டை நடத்தினர். விசாரணையின் முடிவில், சத்தியமங்கலம் பகுதியில் பேருந்துக்காகக் காத்திருந்த சிறுமியைத் தனிப்படை போலீசார் பத்திரமாக மீட்டுப் பெற்றோரிடம் ஒப்படைத்தனர்.