ஆப்கானிஸ்தானில் தலிபான்களின் ஆட்சியின் கீழ் பெண் குழந்தைகள் 6-ஆம் வகுப்புக்கு மேல் கல்வி கற்கத் தடை விதிக்கப்பட்டுள்ளதாக ஐக்கிய நாடுகளின் யுனெஸ்கோ வெளியிட்டுள்ள ஆய்வறிக்கையில் அதிர்ச்சித் தகவல் தெரிவிக்கப்பட்டுள்ளது. கடந்த 2022-ஆம் ஆண்டு மார்ச் மாதம் தலிபான் அரசால் பெண்களுக்கான இடைநிலைப் பள்ளிகள் அனைத்தும் கட்டாயமாக மூடப்பட்டன.

தலிபான்களின் இந்தத் தொடர் கெடுபிடிகளால், கடந்த 5 ஆண்டுகளில் மட்டும் சுமார் 24 லட்சம் பெண் குழந்தைகளின் கல்வி உரிமைகள் முற்றிலுமாகப் பறிக்கப்பட்டுப் பாதிக்கப்பட்டுள்ளனர்.

6-ம் வகுப்பிற்கு மேல் பெண்கள் உயர்கல்விக்கோ அல்லது அடிப்படைப் பள்ளிப் படிப்புக்கோ செல்ல முடியாத நிலை தொடர்ந்து நீடித்து வருகிறது. பெண் குழந்தைகளின் கல்வியை முடக்கும் தலிபான் அரசின் இந்த மனித உரிமை மீறல் நடவடிக்கைக்குச் சர்வதேச அளவில் பல்வேறு நாடுகளைச் சேர்ந்த கல்வியாளர்கள், மனித உரிமை அமைப்புகள் மற்றும் உலகத் தலைவர்கள் தங்களது கடுமையான கண்டனங்களைப் பதிவு செய்து வருகின்றனர்.