உலகின் முன்னணி சிகரெட் தயாரிப்பு நிறுவனங்களில் ஒன்றான 'பிரிட்டிஷ் அமெரிக்கன் டொபாக்கோ', தனது செலவினங்களைக் குறைத்து லாபத்தை அதிகரிக்கும் நோக்கில், உலகளவில் பணிபுரியும் ஊழியர்களின் எண்ணிக்கையில் சுமார் 20 சதவீதத்தைக் குறைக்க அதிரடித் திட்டம் தீட்டியுள்ளது. நிறுவனத்தின் இந்த 'Fit2Win' மறுசீரமைப்பு நடவடிக்கை ஒட்டுமொத்தமாக 9,000 ஊழியர்களை நேரடியாகப் பாதிக்கவுள்ளது.

லக்கியா ஸ்டிரைக் மற்றும் டன்ஹில் போன்ற உலகப் புகழ்பெற்ற சிகரெட் பிராண்டுகளைத் தயாரிக்கும் இந்த நிறுவனம், தங்களது பாரம்பரியப் பணியிடங்களை நவீன தொழில்நுட்பத்திற்கு ஏற்ப மாற்றியமைக்கத் திட்டமிட்டுள்ளது. நிறுவனத்தின் செலவினங்களைக் கட்டுப்படுத்தும் நோக்கில், உலகளாவிய கிளைகளில் இருந்து சுமார் 5,500 பணியிடங்கள் முற்றிலுமாக நீக்கப்படவுள்ளன.

மீதமுள்ள 3,500 பணியிடங்கள், முன்னணி தகவல் தொழில்நுட்ப மற்றும் ஆலோசனை நிறுவனமான 'அக்செஞ்சர்' போன்ற உலகளாவிய கூட்டாண்மை நிறுவனங்களுக்கு அவுட்சோர்சிங் முறையில் மாற்றப்படவுள்ளன. பாரம்பரியச் சிகரெட் விற்பனை உலகளவில் 2.5% வரை வீழ்ச்சியடைந்து வருவதால், நிறுவனம் தனது உற்பத்திப் பாதையை மாற்றத் தொடங்கியுள்ளது:

நுகர்வோர் பலரும் சிகரெட்டுகளில் இருந்து வேப் மற்றும் நிகோடின் பவுச்சுகள் போன்ற புகை இல்லாத மாற்றுத் தயாரிப்புகளுக்கு மாறி வருவதால், அதற்கு ஏற்பத் தங்களை மாற்றிக் கொள்ள நிறுவனம் முயன்று வருகிறது.

இம்மாற்றத்திற்காகச் செயற்கை நுண்ணறிவு, ஆட்டோமேஷன் மற்றும் தரவு பகுப்பாய்வு போன்ற நவீன டிஜிட்டல் தொழில்நுட்பங்களை நிறுவனம் கையில் எடுத்துள்ளது. இதுவே பல நிர்வாகப் பணியிடங்கள் பறிபோக முதன்மைக் காரணியாக அமைந்துள்ளது.

நிறுவனத்தின் முதன்மைச் சந்தையான அமெரிக்காவைத் தவிர்த்து, உலகெங்கிலும் உள்ள மற்ற சர்வதேசக் கிளைகளில் இந்த வேலைநீக்க நடவடிக்கைகள் இந்த 2026-ஆம் ஆண்டு இறுதிக்குள் முழுமையாகச் செயல்படுத்தப்படவுள்ளன. இந்த அசாத்திய மறுசீரமைப்புத் திட்டத்தின் மூலம், வரும் 2028-ஆம் ஆண்டிற்குள் ஆண்டுதோறும் சுமார் 600 மில்லியன் பவுண்டுகள் (சுமார் 793 மில்லியன் அமெரிக்க டாலர்கள்) வரை செலவினங்களை மிச்சப்படுத்த முடியும் என BAT நிறுவனத்தின் தலைமை நிர்வாக அதிகாரி தடேவ் மரோகோ தெரிவித்துள்ளார்.

பாதிக்கப்படும் ஊழியர்களுக்குத் தேவையான அனைத்து மறுவாழ்வு மற்றும் ஆலோசன உதவிகளையும் நிறுவனம் வழங்கும் எனக் குறிப்பிட்டுள்ள நிலையிலும், இந்த திடீர் பெருமளவிலான வேலைநீக்க அறிவிப்பு சர்வதேசத் தனியார் துறை ஊழியர்களிடையே பெரும் அதிர்ச்சியை ஏற்படுத்தியுள்ளது.