JCB மூலம் ஹோட்டலை இடித்த கும்பல்! மேலும் 2 பேர் கைது!

கன்னியாகுமரி மாவட்டம் நாகர்கோவில் அருகே ஹோட்டலை ஜே.சி.பி. எந்திரம் மூலம் இடித்து சேதப்படுத்திய வழக்கில் மேலும் 2 பேரை போலீசார் கைது செய்துள்ளனர்.நாகர்கோவில் கட்டையன்விளை பகுதியில் செயல்பட்டு வந்த உணவகத்துக்குள் நள்ளிரவு நேரத்தில் முகமூடி அணிந்த மர்ம நபர்கள் புகுந்து, ஜே.சி.பி. எந்திரம் மூலம் கட்டிடத்தை இடித்து சேதப்படுத்திவிட்டு சென்றதாக கூறப்படுகிறது.

இதுதொடர்பாக உணவக உரிமையாளர் அளித்த புகாரின் அடிப்படையில் வடசேரி போலீசார் வழக்குப்பதிவு செய்து விசாரணை நடத்தி வந்தனர். சம்பவம் தொடர்பான சிசிடிவி காட்சிகள் உள்ளிட்டவற்றை அடிப்படையாகக் கொண்டு போலீசார் விசாரணையை தீவிரப்படுத்தினர்.

இந்த சம்பவம் முன்விரோதம் காரணமாக நடைபெற்றதாக கூறப்படுகிறது. ஏற்கனவே இந்த வழக்கில் சிலர் கைது செய்யப்பட்டிருந்த நிலையில், போலீசார் தொடர்ந்து விசாரணை மேற்கொண்டு வந்தனர்.இந்த நிலையில், வழக்கில் தொடர்புடையதாக கூறப்படும் மேலும் 2 பேரை போலீசார் தற்போது கைது செய்துள்ளனர். அவர்களிடம் சம்பவம் தொடர்பாக விசாரணை நடைபெற்று வருகிறது.

நள்ளிரவில் ஜே.சி.பி. எந்திரத்தை பயன்படுத்தி உணவகத்தை இடித்து சேதப்படுத்திய சம்பவம் நாகர்கோவில் பகுதியில் பரபரப்பை ஏற்படுத்தியிருந்த நிலையில், தொடர்ந்து நடைபெறும் கைது நடவடிக்கைகள் கவனம் பெற்றுள்ளன. வழக்கில் தொடர்புடைய மேலும் சிலரை கண்டறியும் பணியிலும் போலீசார் ஈடுபட்டுள்ளனர்.