உக்ரைன் போருக்குப் பிந்தைய சர்வதேச அரசியல் சூழலில், ரஷ்யாவிடமிருந்து தொடர்ந்து கச்சா எண்ணெய் கொள்முதல் செய்யும் இந்தியா மற்றும் சீனா உள்ளிட்ட 5 நாடுகள் மீது 100% வரை வர்த்தக வரி விதிப்பதற்கான புதிய திருத்தப்பட்ட மசோதா அமெரிக்க செனட் சபையில் அறிமுகப்படுத்தப்பட்டுள்ளது.

அமெரிக்க ஜனநாயகக் கட்சியின் செனட்டர் ரிச்சர்ட் புளூமெண்டல் மற்றும் அண்மையில் மறைந்த குடியரசுக் கட்சியின் செனட்டர் லிண்ட்சே கிரஹாம் ஆகியோரால் வடிவமைக்கப்பட்ட இந்த இருகட்சி கூட்டு மசோதாவுக்கு, அதிபர் டொனால்ட் டிரம்ப் தனது முழு ஆதரவைத் தெரிவித்துள்ளார்.

ரஷ்யாவின் எரிசக்தி வருவாயை முற்றிலும் முடக்கி, உக்ரைன் போரை முடிவுக்குக் கொண்டு வரும் நோக்கில் இந்த மசோதா கொண்டு வரப்பட்டுள்ளது. தற்போதைய நிலவரப்படி ரஷ்யாவிடமிருந்து அதிகளவில் கச்சா எண்ணெய் வாங்கும் இந்தியா, சீனா, ஸ்லோவாக்கியா,  ஹங்கேரி, அஜர்பைஜான் ஆகிய 5 முக்கிய நாடுகள் இந்த 100% வரி விதிப்புப் பட்டியலில் சேர்க்கப்பட்டுள்ளன.

முன்னதாக, கடந்த ஆண்டு அறிமுகப்படுத்தப்பட்ட இந்த மசோதாவின் ஆரம்பகட்ட வடிவில் 500% வரை அசுரத்தனமான வரி விதிக்கப் பரிந்துரைக்கப்பட்டிருந்தது. ஆனால், நாடாளுமன்ற ஒப்புதலை எளிதாக்கும் வகையிலும் அமெரிக்க வர்த்தகப் பாதிப்பைக் குறைக்கும் வகையிலும் இந்த வரி வரம்பு 100% ஆகக் குறைக்கப்பட்டுள்ளது. இறுதி வரி விகிதத்தை அமெரிக்க வர்த்தகப் பிரதிநிதி தீர்மானிப்பார் எனத் தெரிவிக்கப்பட்டுள்ளது. இந்த மசோதாவில் ஐரோப்பிய நாடுகளுக்கு ஆதரவாக ஒரு குறிப்பிட்ட நிபந்தனை விலக்கு அளிக்கப்பட்டுள்ளது.

ரஷ்யாவிடமிருந்து இயற்கை எரிவாயுவை வாங்கும் நாடுகள், தங்களின் ஒட்டுமொத்தத் தேவையில் 15%-க்கும் குறைவாக அங்கிருந்து இறக்குமதி செய்து, அதே நேரத்தில் ரஷ்யாவின் மீதான சார்பைக் குறைக்கத் தீவிர நடவடிக்கை எடுத்து வந்தால் அவர்களுக்கு இந்த வரியிலிருந்து விலக்கு அளிக்கப்படும்.

இதன் காரணமாக, ரஷ்யாவின் எரிவாயுவை நம்பியிருக்கும் பெரும்பாலான ஐரோப்பிய நாடுகள் இந்த கடுமையான 100% வரி விதிப்புப் பாதிப்பிலிருந்து தப்பித்துக் கொள்ளும் வகையில் மசோதா நுணுக்கமாக வடிவமைக்கப்பட்டுள்ளது.

அமெரிக்காவின் இந்த அதிரடி நடவடிக்கை இந்தியா மற்றும் அமெரிக்கா இடையேயான இருதரப்பு வர்த்தகப் பேச்சுவார்த்தைகளில் பெரும் பின்னடைவை ஏற்படுத்தலாம் என அஞ்சப்படுகிறது. ஏற்கனவே கடந்த ஜூன் மாதத்தில் ரஷ்யாவிடமிருந்து இந்தியாவின் கச்சா எண்ணெய் இறக்குமதி 34% உயர்ந்து சாதனை அளவை எட்டியுள்ளது. தற்பொழுது இந்தியா அமெரிக்காவுடன் தனது ஒட்டுமொத்த வர்த்தக வரியை 18% ஆகக் குறைக்கப் பேச்சுவார்த்தை நடத்தி வரும் சூழலில், இந்த 100% வரி விதிப்பு மசோதா சட்டமாக்கப்பட்டால் அது இந்திய ஏற்றுமதியாளர்களைப் பெரிதும் பாதிக்கும் எனப் பொருளாதார வல்லுநர்கள் எச்சரிக்கின்றனர்.