நைஜீரியாவில் சிறையில் 33 கைதிகள் மர்ம மரணம்! நோயா? மூச்சுத்திணறலா? விசாரணை தீவிரம்

நைஜீரியாவின் நைஜர் மாகாணத்தில் சட்டவிரோத சுரங்க நடவடிக்கையில் ஈடுபட்டதாக கைது செய்யப்பட்டவர்களில் 33 பேர், பாதுகாப்புப் படையினரின் காவலில் இருந்தபோது உயிரிழந்த சம்பவம் அதிர்ச்சியை ஏற்படுத்தியுள்ளது.

நைஜர் மாகாணத்தில் சட்டவிரோத தங்கச் சுரங்கங்களுக்கு எதிராக பாதுகாப்புப் படையினர் நடத்திய சோதனையில் 65 பேர் கைது செய்யப்பட்டனர். அவர்கள் நைஜீரியா பாதுகாப்பு மற்றும் குடிமை பாதுகாப்புப் படையினரின் காவலில் வைக்கப்பட்டனர். அங்கு 33 பேர் உயிரிழந்ததாக அதிகாரிகள் தெரிவித்துள்ளனர்.

 கைதிகள் உயிரிழந்ததற்கு நோய் பாதிப்பு காரணமாக இருக்கலாம் என அதிகாரிகள் சந்தேகம் தெரிவித்துள்ளனர். ஆனால் மரணத்திற்கான உண்மையான காரணத்தை உறுதி செய்வதற்காக உடல்கள் மருத்துவப் பரிசோதனைக்கு அனுப்பப்பட்டுள்ளன.

 இதற்கிடையே, உயிர் தப்பிய கைதி ஒருவர் வேறுபட்ட தகவலை தெரிவித்துள்ளார். 65 பேரும் குறுகிய, போதிய காற்றோட்டம் இல்லாத அறையில் அடைக்கப்பட்டிருந்ததாகவும், திடீரென மூச்சுவிட முடியாமல் பலர் அவதிப்பட்டதாகவும் அவர் கூறியுள்ளார். இந்தக் கூற்று குறித்து அதிகாரிகள் விசாரணை நடத்தி வருகின்றனர்.

 33 பேர் உயிரிழந்த சம்பவம் தொடர்பாக விசாரணை தொடங்கப்பட்டுள்ளது. சம்பவத்தின் பின்னணி மற்றும் மரணத்திற்கான காரணம் குறித்து மருத்துவப் பரிசோதனை மற்றும் விசாரணை மூலம் தெளிவு பெறப்படும் என தெரிவிக்கப்பட்டுள்ளது. இதற்கிடையே சம்பவத்தைக் கண்டித்து அப்பகுதியில் போராட்டங்களும் நடைபெற்றதாக தகவல்கள் வெளியாகியுள்ளன.