இன்று ஓணம் பண்டிகையைக் முன்னிட்டுச் சபரிமலை ஐயப்பன் கோயிலில் அனைத்து பக்தர்களுக்கும் தேவஸ்தானம் சார்பில் ஓணம் சத்யா விருது வழங்கப்படுகிறது. 

முன்னதாக ஓணம் பண்டிகையை முன்னிட்டு சபரிலையில் கடந்த திங்கட்கிழமை மாலை 5 மணிக்கு கோயில் தந்திரி கண்டரரு பிரம்மதத்தன் முன்னிலையில் மேல்சாந்தி பிரசாத் நம்பூதிரி நடையைத் திறந்து வைத்து தீபம் ஏற்றி வைத்தார். அதனைத் தொடர்ந்து பதினெட்டாம் படிக்குக் கீழே உள்ள ஆழியில் தீ மூட்டப்பட்டது. 

உத்திராட நாளான நேற்று செவ்வாய்க்கிழமை காலை 5 மணி முதல் பக்தர்கள் சாமி தரிசனத்திற்கு அனுமதிக்கப்பட்டனர். இதனைத் தொடர்ந்து  உத்திராடம், திருவோணம், அவிட்டம் மற்றும் சதயம் ஆகிய நாட்களில் கோயிலில் சிறப்புப் பூஜைகளும் வழிபாடுகளும் நடைபெறுகின்றன.

ஓணம் திருநாளான இன்று 26-ம் தேதி சபரிமலைக்குத் தரிசனத்திற்கு வரும் அனைத்துப் பக்தர்களுக்கும் திருவிதாங்கூர் தேவஸ்தானம் சார்பில் பிரம்மாண்டமான முறையில் 'ஓண சத்யா' (ஓண விருந்து) வழங்கப்படுகிறது. ஓணம் திருவிழா சிறப்புப் பூஜைகள் அனைத்தும் நிறைவடைந்த பிறகு, வருகிற ஆகஸ்ட் 28-ம் தேதி இரவு 10 மணிக்குக் கோயில் நடை அடைக்கப்படும் எனத் தெரிவிக்கப்பட்டுள்ளது.