விருதுநகர் மாவட்டம் சாத்தூர் அருகே உள்ள சத்திரப்பட்டி பகுதியில் இயங்கி வரும் பட்டாசு ஆலையில் இன்று காலை ஏற்பட்ட பயங்கர வெடிவிபத்தில் தொழிலாளி ஒருவர் உயிரிழந்தார்.

சத்திரப்பட்டி பகுதியில் உள்ள தனியார் பட்டாசு ஆலையில் இன்று (ஏப்ரல் 13) காலை தொழிலாளர்கள் வழக்கம்போல் பணியில் ஈடுபட்டிருந்தனர். அப்போது எதிர்பாராத விதமாக ஒரு அறையில் மருந்து உராய்வு ஏற்பட்டு வெடிவிபத்து நிகழ்ந்தது. இதில் அந்த அறையில் பணியாற்றி வந்த தொழிலாளி ஒருவருக்கு உடல் முழுவதும் பலத்த காயம் ஏற்பட்டது.

சம்பவம் குறித்துத் தகவல் அறிந்தவுடன் சாத்தூர் மற்றும் சிவகாசியில் இருந்து தீயணைப்புத் துறையினர் விரைந்து வந்தனர். ஆலை முழுவதும் பரவிய தீயைத் தீயணைப்பு வீரர்கள் நீண்ட நேரம் போராடி அணைத்தனர். படுகாயமடைந்த தொழிலாளியை மீட்ட அதிகாரிகள், அவரை உடனடியாகச் சிகிச்சைக்காகச் சிவகாசி அரசு மருத்துவமனைக்கு அனுப்பி வைத்தனர். இருப்பினும், மருத்துவமனையில் தீவிர சிகிச்சை அளிக்கப்பட்டு வந்த நிலையில், சிகிச்சை பலனின்றி அவர் உயிரிழந்தார்.

இந்த விபத்து குறித்துத் தகவல் அறிந்த வருவாய்த் துறை மற்றும் காவல்துறையினர் சம்பவ இடத்திற்கு நேரில் வந்து ஆய்வு செய்தனர். விபத்துக்கான சரியான காரணம் குறித்தும், ஆலை விதிமுறைகளின்படி செயல்பட்டதா என்பது குறித்தும் போலீசார் வழக்குப் பதிவு செய்து தீவிர விசாரணை மேற்கொண்டு வருகின்றனர்.