திருச்சியில் நடைபெறவுள்ள தேசிய ஜனநாயகக் கூட்டணியின் பிரம்மாண்டப் பொதுக்கூட்டத்திற்கான ஏற்பாடுகள் தீவிரமடைந்துள்ள நிலையில், கூட்டணிக் கட்சித் தலைவர்களுக்கிடையேயான நெருக்கத்தைக் காட்டும் ஒரு சுவாரஸ்யமான சம்பவம் இன்று நிகழ்ந்துள்ளது.

தமிழகத்தில் 2026 சட்டமன்றத் தேர்தலை முன்னிட்டு, பிரதமர் நரேந்திர மோடி பங்கேற்கும் மெகா பொதுக்கூட்டம் வரும் மார்ச் 11-ஆம் தேதி திருச்சியில் நடைபெறவுள்ளது. இதற்கான இடத்தை தேர்வு செய்யும் பணியில் கூட்டணிக் கட்சித் தலைவர்கள் இன்று ஈடுபட்டனர்.

பாஜக மாநிலத் தலைவர் நயினார் நாகேந்திரன் மற்றும் அதிமுக முன்னாள் அமைச்சர் சி. விஜயபாஸ்கர் ஆகியோர் இன்று திருச்சிக்கு வருகை தந்தனர். முதலில் திருச்சி பஞ்சப்பூர் பகுதியில் அமையவுள்ள ஒருங்கிணைந்த பேருந்து முனையத்திற்கு அருகிலுள்ள மைதானத்தைப் பார்வையிட்டனர். அதனைத் தொடர்ந்து, பொன்மலை பகுதியில் உள்ள 'ஜி கார்னர்' மைதானத்தையும் அவர்கள் ஆய்வு செய்தனர். பிரதமரின் பாதுகாப்பு மற்றும் கூட்ட நெரிசலைக் கருத்தில் கொண்டு எந்த இடம் பொருத்தமாக இருக்கும் என்பது குறித்து அதிகாரிகளுடன் ஆலோசித்தனர். இந்த ஆய்வின்போது பஞ்சப்பூரிலிருந்து ஜி கார்னர் பகுதிக்குச் செல்வதற்காகத் தலைவர்கள் தயாரான போது முன்னாள் அமைச்சர் விஜயபாஸ்கர் தனது காரின் ஓட்டுநர் இருக்கையில் அமர்ந்தார்.

பாஜக மாநிலத் தலைவர் நயினார் நாகேந்திரனைத் தனது காரில் ஏற்றி அமர வைத்த விஜயபாஸ்கர், தானே காரை ஓட்டிச் சென்றார். அதிமுக மற்றும் பாஜகவின் முக்கியத் தலைவர்கள் ஒரே காரில் இணக்கமாகச் சென்றதைக் கண்ட இரு கட்சித் தொண்டர்களும் உற்சாகமடைந்து முழக்கங்களை எழுப்பினர்.

சமீபத்தில் மதுரையில் நடைபெற்ற பொதுக்கூட்டத்தைத் தொடர்ந்து, திருச்சியில் நடைபெறவுள்ள இந்தப் பொதுக்கூட்டம் மத்திய மற்றும் தென் தமிழகத்தில் கூட்டணியின் பலத்தை நிரூபிக்கும் ஒரு முக்கிய நிகழ்வாகப் பார்க்கப்படுகிறது. தொகுதிப் பங்கீட்டுப் பேச்சுவார்த்தைகள் ஒருபுறம் பரபரப்பாக நடந்தாலும், களத்தில் தலைவர்கள் காட்டும் இந்த ஒற்றுமை கூட்டணிக்குள் நிலவும் இணக்கத்தைச் சுட்டிக்காட்டுகிறது.