தமிழக அரசியல் களம் பல்வேறு புதிய கூட்டணிக் கணக்குகளாலும் அதிரடி நகர்வுகளாலும் பரபரப்பாகக் காட்சியளித்து வரும் வேளையில், காங்கிரஸ் கட்சியின் மூத்த தலைவரும் முன்னாள் மத்திய அமைச்சருமான ப.சிதம்பரம் எம்பி, விடுதலைச் சிறுத்தைகள் கட்சியின் தலைவர் தொல். திருமாவளவனை நேரில் சந்தித்துப் பேசியுள்ளார். சென்னை அசோக் நகரில் அமைந்துள்ள விசிகவின் தலைமை அலுவலகமான 'அம்பேத்கர் திடல்' வளாகத்தில் இந்த முக்கியச் சந்திப்பு அரங்கேறியுள்ளது.

அம்பேத்கர் திடலுக்கு வருகை தந்த காங்கிரஸ் மூத்த தலைவர் ப.சிதம்பரத்தை, விசிக நிறுவனத் தலைவரும் சிதம்பரம் நாடாளுமன்றத் தொகுதி உறுப்பினருமான தொல். திருமாவளவன் மற்றும் விசிக முன்னணி நிர்வாகிகள் பொன்னாடை போர்த்தி, மிகுந்த சுமுகமான முறையில் வரவேற்றனர்.

இதனைத் தொடர்ந்து இரு தலைவர்களும் விசிக தலைமை அலுவலகத்தில் அமர்ந்து, சுமார் அரை மணி நேரத்திற்கும் மேலாகத் தனியாக ஆலோசனையில் ஈடுபட்டனர். சந்திப்பு நிறைவடைந்ததும் செய்தியாளர்களைச் சந்தித்த ப.சிதம்பரம், "இந்தச் சந்திப்பு முற்றிலும் ஒரு மரியாதை நிமித்தமான சந்திப்பு மட்டுமே" என்று சுருக்கமாக விளக்கமளித்துக் கடந்து சென்றார்.

இருப்பினும், தமிழகத்தில் அண்மையில் ஏற்பட்ட அரசியல் மாற்றங்கள் மற்றும் புதிய கூட்டணி மறுசீரமைப்புகளுக்கு மத்தியில், 'இந்தியா'  கூட்டணியின் ஒருமைப்பாட்டைப் பேணவும், தற்போதைய அரசியல் சூழலில் இரு கட்சிகளுக்கு இடையேயான இணக்கத்தை மேலும் வலுப்படுத்தவும் இந்தச் சந்திப்பில் ஆலோசிக்கப்பட்டதாக அரசியல் உள்வட்டாரத் தகவல்கள் தெரிவிக்கின்றன. தமிழகத்தின் இரு முக்கியக் கூட்டணிக் கட்சித் தலைவர்களின் இந்தத் திடீர் சந்திப்பு அரசியல் வட்டாரங்களில் உற்றுநோக்கப்பட்டு விவாதப் பொருளாக மாறியுள்ளது.