பாகிஸ்தான் நாடு சந்தித்து வரும் மிகக் கடுமையான பொருளாதார நெருக்கடி, வரலாறு காணாத பணவீக்கம் மற்றும் வேலைவாய்ப்பின்மை காரணமாக, கடந்த ஆறு ஆண்டுகளில் அந்நாட்டின் ஏழைகளின் எண்ணிக்கை 7 விழுக்காடு அதிகரித்துள்ளது. இதன் காரணமாக, பாகிஸ்தானில் வறுமைக் கோட்டுக்குக் கீழ் வாழும் மக்களின் ஒட்டுமொத்த எண்ணிக்கை தற்போது 7 கோடியாக (70 மில்லியன்) உயர்ந்துள்ளது.

மத்திய பட்ஜெட் தாக்கல் செய்யப்படுவதற்கு முன்னதாக அதிகாரப்பூர்வமாக வெளியிடப்பட்ட 'பாகிஸ்தான் பொருளாதாரக் கணக்கெடுப்பு 2025-26 அறிக்கையில் இந்த அதிர்ச்சியூட்டும் புள்ளிவிவரங்கள் வெளியாகியுள்ளன.

பாகிஸ்தான் அரசின் அதிகாரப்பூர்வ பொருளாதாரக் கணக்கெடுப்பின்படி, கடந்த 2018-19 ஆம் நிதியாண்டில் அந்நாட்டின் வறுமை விகிதம் 21.9 விழுக்காடாக இருந்தது. ஆனால், தற்போதைய 2024-25 நிதியாண்டின் முடிவில் இது 28.9 விழுக்காடாகக் கடுமையாக உயர்ந்துள்ளது.

கடந்த ஆறு ஆண்டுகளில் மட்டுமே புதிதாக 2 கோடியே 70 லட்சம் (27 மில்லியன்) மக்கள் வறுமையின் பிடிக்குள் தள்ளப்பட்டுள்ளனர். இது ஒட்டுமொத்த மக்கள் தொகையில் சுமார் மூன்றில் ஒரு பங்கு மக்கள் வறுமையில் வாடுவதைக் காட்டுகிறது.

இந்த வறுமை உயர்வு கிராமப்புறம், நகர்ப்புறம் என இரு தரப்பையுமே கடுமையாகப் பாதித்துள்ளது. கிராமப்புறங்களில் வறுமை விகிதம் 28.2 விழுக்காடில் இருந்து 36.2 விழுக்காடாக அதிகரித்துள்ளது. நகரப் பகுதிகளில் 11 விழுக்காடாக இருந்த வறுமை, தற்போது 17.4 விழுக்காடாக உயர்ந்துள்ளது. மாகாண வாரியாகப் பார்க்கும்போது, பலுசிஸ்தான் மாகாணம் 47 விழுக்காடு வறுமையுடன் நாட்டின் மிகவும் பின்தங்கிய பகுதியாகத் தொடர்கிறது. பஞ்சாப் மாகாணம் 23.3 விழுக்காட்டுடன் மற்ற மாகாணங்களை விடக் குறைந்த பாதிப்பைக் கொண்டுள்ளது. இருப்பினும், அனைத்து மாகாணங்களிலுமே முந்தைய ஆண்டுகளை விட வறுமை கணிசமாக உயர்ந்துள்ளது.

பாகிஸ்தானில் வறுமை இந்த அளவுக்குக் கட்டுக்கடங்காமல் உயர்ந்ததற்குப் பல காரணங்களை அந்த அறிக்கை சுட்டிக்காட்டுகிறது. சர்வதேச நாணய நிதியத்தின் நிபந்தனைகளால் விதிக்கப்பட்ட கடுமையான பொருளாதாரக் கட்டுப்பாடுகள், பாகிஸ்தானிய ரூபாயின் மதிப்பு தொடர்ந்து சரிவைச் சந்தித்தது மற்றும் கட்டுப்பாடற்ற விலைவாசி உயர்வு ஆகியவை மக்களின் வாங்கும் திறனை முற்றிலும் சீர்குலைத்துள்ளன.

இவற்றுடன், கடந்த காலங்களில் ஏற்பட்ட வரலாறு காணாத பெருவெள்ளம் போன்ற பருவநிலை மாற்றப் பேரிடர்கள் மற்றும் உலகளாவிய புவிசார் அரசியல் பதற்றங்கள் ஆகியவை பாகிஸ்தானின் பொருளாதார வளர்ச்சியை முற்றிலுமாக முடக்கியுள்ளன.

வருமானப் பகிர்வில் நிலவும் சமத்துவமின்மையை அளவிடும் தேசிய கினி குணகம் 28.4-இல் இருந்து 32.7 ஆக உயர்ந்துள்ளது. இது பணக்காரர்களுக்கும் ஏழைகளுக்கும் இடையிலான இடைவெளி அந்நாட்டில் மேலும் அதிகரித்துள்ளதை உறுதிப்படுத்துகிறது.