சென்னை அம்பத்தூர் அருகே வீட்டில் விளையாடிக் கொண்டிருந்த 2 வயது பெண் குழந்தை, குளியலறையில் இருந்த பிளாஸ்டிக் தண்ணீர் தொட்டிக்குள் தலைக்குப்புற விழுந்து மூச்சுத்திணறிப் பரிதாபமாக உயிரிழந்த சம்பவம் அப்பகுதியில் பெரும் சோகத்தை ஏற்படுத்தியுள்ளது.

ராணிப்பேட்டை மாவட்டம் சோளிங்கர் பகுதியைச் சேர்ந்தவர் கலையரசன் (40). இவரது மனைவி இந்துமதி (37). இந்த தம்பதிக்கு 4 வயதில் ஒரு ஆண் குழந்தையும், 2 வயதில் யுவராணி என்ற பெண் குழந்தையும் உள்ளனர். கலையரசன் தனது இரண்டு குழந்தைகளையும் சென்னை அம்பத்தூரை அடுத்த ஓரகடம், கம்பர் தெருவில் உள்ள தனது பெற்றோரின் (குழந்தைகளின் தாத்தா-பாட்டி) வீட்டில் வளர்ப்பதற்காக விட்டுச் சென்றுள்ளார்.

அவர்களது வீட்டுக்கு அருகே வசிக்கும் உறவினர் ஒருவருக்குத் திருமண ஏற்பாடுகள் விறுவிறுப்பாக நடந்து வந்துள்ளது. இதன் காரணமாக நேற்று முன்தினம், வீட்டில் இருந்த பெரியவர்கள் குழந்தைகளை வீட்டில் விட்டுவிட்டுத் திருமண வேலைகளுக்காகச் சற்று வெளியே சென்றுள்ளனர். அப்போது 2 வயது குழந்தை யுவராணி மட்டும் வீட்டில் தனியாக விளையாடிக் கொண்டிருந்ததாகத் தெரிகிறது.

வெளியே சென்ற குடும்பத்தினர் சிறிது நேரத்திலேயே மீண்டும் வீட்டுக்குத் திரும்பியுள்ளனர். அப்போது நீண்ட நேரமாகியும் குழந்தையின் சத்தம் கேட்காததால், வீடு முழுவதும் தேடிப் பார்த்துள்ளனர். வீட்டின் குளியலறையில் சென்று பார்த்த போது அங்கிருந்த காட்சிகள் அவர்களை உலுக்கியெடுத்தது. குளியலறையில் தண்ணீர் நிரப்பி வைக்கப்பட்டிருந்த 3 அடி உயரமுள்ள பிளாஸ்டிக் தொட்டிக்குள், குழந்தை யுவராணி தலைக்குப்புற விழுந்து கிடந்துள்ளார்.

இதனைப் பார்த்துக் குடும்பத்தினர் அலறியடித்துக்கொண்டு, குழந்தையை உடனடியாக மீட்டு அருகில் உள்ள தனியார் மருத்துவமனைக்கு அவசர அவசரமாகக் கொண்டு சென்றனர். அங்குச் குழந்தையைப் பரிசோதித்த மருத்துவர்கள், குழந்தை ஏற்கனவே மூச்சுத்திணறி இறந்துவிட்டதாகப் பரிதாபமாகத் தெரிவித்தனர். விளையாடிக்கொண்டிருந்த குழந்தை, குளியலறைக்குள் சென்று எதிர்பாராத விதமாகத் தண்ணீர் தொட்டிக்குள் தவறி விழுந்ததே இந்த மரணத்திற்குத் தற்போதைய காரணம் எனத் தெரியவந்துள்ளது.

இச்சம்பவம் குறித்துத் தகவல் அறிந்த அம்பத்தூர் போலீசார், குழந்தையின் உடலைக் கைப்பற்றி வழக்குப் பதிவு செய்து தீவிர விசாரணை நடத்தி வருகின்றனர். திருமண வீட்டின் பரபரப்பில், சிறு குழந்தைகள் உள்ள வீடுகளில் தண்ணீர் நிரப்பப்பட்ட தொட்டிகளைத் திறந்து வைப்பது எவ்வளவு பெரிய ஆபத்து என்பதை இந்தச் சம்பவம் உணர்த்தியுள்ளது. இத்துயரச் சம்பவம் அம்பத்தூர் பகுதியில் பெரும் சோக அலையை ஏற்படுத்தியுள்ளது.