அர்ஜெண்டினா நாட்டில் நடுவானில் மாணவி ஒருவருக்குப் பயிற்சி அளித்துக் கொண்டிருந்த 42 வயதுடைய முதன்மை விமானப் பயிற்சியாளர், திடீரென விமானத்தின் கதவைத் திறந்து கீழே குதித்துத் தற்கொலை செய்து கொண்ட அதிர்ச்சிச் சம்பவம் சர்வதேச அளவில் பெரும் பரபரப்பை ஏற்படுத்தியுள்ளது.

அர்ஜெண்டினாவில் லியாண்ட்ரோ என்ற அனுபவம் வாய்ந்த விமானப் பயிற்சியாளர், 22 வயதுடைய இளம் பெண் மாணவி ஒருவரை சிறிய ரகப் பயிற்சி விமானத்தில் அழைத்துச் சென்று நடுவானில் விமானம் ஓட்டும் பயிற்சியை அளித்துக் கொண்டிருந்தார்.

விமானம் வானில் நிலைநிறுத்தப்பட்டுப் பறந்து கொண்டிருந்த போது, திடீரெனப் பயிற்சியாளர் லியாண்ட்ரோ விமானத்தின் அவசரக் காலக் கதவைத் திறந்துள்ளார். அதிர்ச்சியடைந்த மாணவியிடம், "உனக்கு என்ன செய்ய வேண்டும் எனத் தெரியும்" என்று கூறிவிட்டு, கண்ணிமைக்கும் நேரத்தில் விமானத்திலிருந்து கீழே குதித்துத் தனது உயிரை மாய்த்துக் கொண்டார்.

நடுவானில் தற்கொலைப்படை தாக்குதலுக்கு நிகரான இந்தச் சம்பவத்தின் போது, தனது முதன்மைப் பயிற்சியாளர் கண்முன்னே குதித்ததால் அந்த 22 வயது மாணவி நிலைகுலைந்து போனார்.

தனியாக விமானத்தைக் கட்டுப்படுத்த வேண்டிய இக்கட்டான சூழலிலும், அந்த இளம் மாணவி தனது பதற்றத்தைக் கட்டுப்படுத்திக் கொண்டு, தமக்குக் கற்றுக் கொடுக்கப்பட்ட அவசரக் கால விதிகளின்படி விமானத்தைச் சாமர்த்தியமாகச் கையாண்டு, அருகிலிருந்த விமான ஓடுதளத்தில் பாதுகாப்பாகத் தரையிறக்கி உயிர் தப்பினார்.

பயிற்சியாளர் லியாண்ட்ரோ எதற்காக நடுவானில் இத்தகைய விபரீத முடிவை எடுத்தார், அவருக்கு ஏதேனும் கடுமையான மன உளைச்சல் அல்லது குடும்பப் பிரச்சினைகள் இருந்ததா என்ற கோணத்தில் அர்ஜெண்டினா நாட்டுப் பாதுகாப்புப் படையினர் மற்றும் உள்ளூர் போலீசார் தீவிர வழக்குப் பதிவு செய்து விசாரணை நடத்தி வருகின்றனர்.

அவரது உடல் விழுந்ததாகக் கருதப்படும் அடர்ந்த காட்டுப் பகுதிகள் மற்றும் குடியிருப்புப் பகுதிகளில் உடலைத் தேடும் பணிகளுக்காகப் மீட்புக் குழுவினர் மற்றும் போலீசார் குவிக்கப்பட்டுள்ளனர். மேலும், அதிர்ச்சியிலிருந்து மீளாத அந்த இளம் மாணவிக்கு தீவிர மருத்துவ மற்றும் உளவியல் சிகிச்சை அளிக்கப்பட்டு வருகிறது. இச்சம்பவம் குறித்து சர்வதேச விமானப் போக்குவரத்துப் பாதுகாப்பு வாரியம் விரிவான விசாரணைக்கு உத்தரவிட்டுள்ளது.