முன்னாள் பிரதமர் இந்திரா காந்தி குடும்பத்தினர் குறித்துச் சமூக ஊடகங்களில் சர்ச்சைக்குரிய வகையில் கருத்துகளைப் பதிவிட்ட விவகாரத்தில், நடிகையும் பாரதிய ஜனதா கட்சி நாடாளுமன்ற உறுப்பினருமான கங்கனா ரனாவத் மீது இமாச்சலப் பிரதேச காவல்துறையினர் 3 பிரிவுகளின் கீழ் வழக்குப் பதிவு செய்துள்ளனர். இமாச்சலப் பிரதேசத்தைச் சேர்ந்த கேப்டன் அதுல் சர்மா என்பவர் அளித்த புகாரின் அடிப்படையில் சிம்லா காவல் நிலையத்தில் இந்த நடவடிக்கை எடுக்கப்பட்டுள்ளது.

கடந்த நவம்பர் 10-ஆம் தேதி, நடிகையும் பாஜக எம்.பி.யுமான கங்கனா ரனாவத் தனது சமூக வலைதளப் பக்கத்தில் இந்தியாவின் முன்னாள் பிரதமர் இந்திரா காந்தி மற்றும் அவரது குடும்பத்தினரின் மரணம் தொடர்பாகச் சர்ச்சைக்குரிய கருத்துகளைப் பதிவிட்டிருந்தார்.

இந்தப் பதிவு பொதுவெளியில் பெரும் விவாதத்தையும், அரசியல் வட்டாரத்தில் கடும் கண்டனங்களையும் ஏற்படுத்தியது. இதன் தொடர்ச்சியாக, சமூக நல்லிணக்கத்தைக் குலைக்கும் வகையிலும், அவதூறு பரப்பும் வகையிலும் பதிவிட்டுள்ளதாகக் கூறி கேப்டன் அதுல் சர்மா காவல் நிலையத்தில் முறைப்படி புகார் அளித்தார்.

புகாரைப் பரிசீலித்த சிம்லா காவல்துறையினர், கங்கனா ரனாவத் மீது மூன்று முக்கியப் பிரிவுகளின் கீழ் வழக்குப் பதிவு செய்து தீவிர விசாரணை நடத்தி வருகின்றனர்.

ஏற்கனவே பல்வேறு சர்ச்சைகளில் சிக்கி வரும் கங்கனா ரனாவத் மீது, அவரது சொந்த மாநிலத்திலேயே காவல்துறை வழக்குப்பதிவு செய்திருப்பது தேசிய மற்றும் மாநில அரசியல் களத்தில் பெரும் பரபரப்பை ஏற்படுத்தியுள்ளது. இச்சம்பவம் குறித்துத் சட்ட வல்லுநர்களுடன் ஆலோசித்து அடுத்த கட்ட நடவடிக்கைகள் எடுக்கப்படும் என எதிர்பார்க்கப்படுகிறது.