மத்திய அரசின் பிரதமர் கிசான் சம்மான் நிதிதிட்டத்தின் கீழ் விவசாயிகளுக்கு ஆண்டுதோறும் 6,000 ரூபாய் மூன்று தவணைகளாக வழங்கப்பட்டு வருகிறது. தற்போது 22-வது தவணைத் தொகை வழங்கப்பட உள்ள நிலையில், சில முக்கியமான விதிமுறைகளை பின்பற்றாத விவசாயிகளுக்கு இந்த ரூ.2,000 கிடைப்பதில் சிக்கல் ஏற்பட்டுள்ளது. பி.எம். கிசான் திட்டத்தின் அடுத்த தவணைத் தொகை வரும் மார்ச் மாதம் ஹோலி பண்டிகைக்கு முன்னதாக விவசாயிகளின் வங்கி கணக்கில் நேரடியாகச் செலுத்தப்படும் என்று எதிர்பார்க்கப்படுகிறது. இருப்பினும், லட்சக்கணக்கான விவசாயிகள் தொழில்நுட்பக் காரணங்களால் இந்தப் பணத்தை இழக்கும் அபாயம் உள்ளது.

பி.எம். கிசான் திட்டத்தில் பயன்பெறும் அனைத்து விவசாயிகளும் தங்களது e-KYC விவரங்களைப் புதுப்பிப்பது கட்டாயமாக்கப்பட்டுள்ளது. நீங்கள் ஏற்கனவே செய்திருந்தாலும், போர்ட்டலில் உங்கள் நிலை 'வெற்றி' என்று இருக்கிறதா என்பதை மீண்டும் ஒருமுறை சரிபார்ப்பது அவசியம்.

ஆதார் - வங்கி கணக்கு இணைப்பு: உங்கள் வங்கி கணக்குடன் ஆதார் எண் இணைக்கப்பட்டிருக்க வேண்டும். பல விவசாயிகள் ஆதார் எண்ணை வைத்திருந்தாலும், வங்கியில் அதனை 'சீடிங்' செய்திருக்க மாட்டார்கள். இதனால் பணப் பரிமாற்றம் தோல்வியடைய வாய்ப்புள்ளது.

மத்திய அரசின் நிதி உதவிகள் அனைத்தும் 'நேரடி பணப்பரிமாற்றம்' (DBT) முறைப்படி வழங்கப்படுகின்றன. இதற்கு உங்கள் வங்கி கணக்கு மேப்பிங்கில் இணைக்கப்பட்டிருக்க வேண்டும். இது புதுப்பிக்கப்படவில்லை என்றால் பணம் உங்கள் கணக்கிற்கு வராது. உங்கள் பெயரில் உள்ள நில ஆவணங்கள் பி.எம். கிசான் போர்ட்டலில் சரியாகப் பதிவேற்றப்பட்டு, அதிகாரிகளால் சரிபார்க்கப்பட்டிருக்க வேண்டும். 'Land Seeding' என்பதில் 'No' என்று இருந்தால், உங்களுக்குத் தவணைத் தொகை வராது.

பி.எம். கிசான் அதிகாரப்பூர்வ இணையதளமான pmkisan.gov.in பக்கத்திற்குச் சென்று 'Know Your Status' என்ற பகுதியைச் சொடுக்கவும். உங்கள் பதிவு எண் அல்லது ஆதார் எண்ணைப் பயன்படுத்தி உங்கள் விவரங்களைச் சரிபார்க்கலாம். இணையதளத்தில் அப்டேட் செய்யத் தெரியாத விவசாயிகள், அருகில் உள்ள பொதுச் சேவை மையங்களுக்கு (CSC) சென்று தங்களது e-KYC மற்றும் பயோமெட்ரிக் விவரங்களைப் புதுப்பித்துக் கொள்ளலாம். உங்கள் வங்கி கணக்கில் ஆதார் இணைப்பு மற்றும் NPCI மேப்பிங் சரியாக உள்ளதா என்பதை உறுதிப்படுத்த உங்கள் வங்கி கிளையை அணுகவும்.

2026-ம் ஆண்டு மார்ச் மாதம் ஹோலி பண்டிகை வருவதால், அதற்கு முன்பாகவே இந்தத் தொகையை வழங்க மத்திய அரசு திட்டமிட்டுள்ளது. தகுதியுள்ள விவசாயிகள் உரிய நேரத்தில் தங்களது ஆவணங்களைச் சரிசெய்து கொண்டால், எவ்விதத் தடையுமின்றி ரூ.2,000 பெற முடியும்.