ராஜஸ்தான் மாநிலத்தில் நிகழ்ந்த கோர விபத்தில் உயிரிழந்த 'சூப்பர் குட் பிலிம்ஸ்' ஆர்.பி. சௌத்ரியின் கடைசி நிமிடங்கள் குறித்த வீடியோ காட்சி வெளியாகி, காண்போரை நிலைகுலையச் செய்துள்ளது.

கடந்த மே 5-ஆம் தேதி ராஜஸ்தானில் பயணம் மேற்கொண்டிருந்த ஆர்.பி. சௌத்ரி, விபத்து நிகழ்வதற்குச் சில நிமிடங்களுக்கு முன்பு அங்குள்ள ஒரு உணவகத்தில் உணவு உட்கொண்டுள்ளார். அந்த வீடியோவில் அவர் மிகவும் உற்சாகமாகவும், இயல்பாகவும் உணவு அருந்துவது பதிவாகியுள்ளது. உணவு உண்டு முடித்துவிட்டு அவர் காரில் புறப்பட்ட அடுத்த சில நிமிடங்களிலேயே அந்தத் துயரமான விபத்து நிகழ்ந்துள்ளதாகத் தகவல்கள் தெரிவிக்கின்றன. சிரித்த முகத்துடன் அவர் இருக்கும் இந்த வீடியோ, "வாழ்க்கை எவ்வளவு நிலையற்றது" என்பதை உணர்த்துவதாக ரசிகர்கள் மற்றும் திரையுலகினர் பதிவிட்டு வருகின்றனர்.

allowfullscreen

ஆர்.பி. சௌத்ரியின் உடல் சென்னைக்குக் கொண்டு வரப்பட்டு அஞ்சலிக்காக வைக்கப்பட்டுள்ள நிலையில், நேற்றைய தினம் (மே 6) தமிழக வெற்றிக் கழகத் தலைவர் விஜய் நேரில் வந்து அஞ்சலி செலுத்தினார். தனது ஆரம்பகால சினிமா பயணத்தில் மிகப்பெரிய திருப்புமுனையை ஏற்படுத்திய 'பூவே உனக்காக', 'லவ் டுடே' போன்ற படங்களைத் தயாரித்த சௌத்ரிக்கு, விஜய் மிகுந்த கனத்த இதயத்துடன் அஞ்சலி செலுத்தினார். அவருடன் நடிகர்கள், இயக்குநர்கள் மற்றும் தொழில்நுட்பக் கலைஞர்கள் எனப் பலரும் திரண்டு வந்து அவரது குடும்பத்தினருக்கு ஆறுதல் கூறினர்.

தனது தந்தையின் இந்தத் திடீர் மறைவால் நிலைகுலைந்து போயுள்ள நடிகர்கள் ஜீவா மற்றும் ஜித்தன் ரமேஷ் ஆகியோருக்கு திரையுலகம் முழுவதுமே தங்களது ஆதரவைத் தெரிவித்து வருகிறது. இறுதிச் சடங்குகள் இன்று நடைபெற்ற நிலையில் நடிகர் ரஜினிகாந்த் உட்பட திரையுலக பிரபலங்கள் நேரில் அஞ்சலி செலுத்தினர்.