அசாம் மாநிலத்தில் 'ஸ்பா' எனப்படும் மசாஜ் சென்டர் என்ற பெயரில் ரகசியமாக விபச்சாரத்தில் ஈடுபட்டு வந்ததோடு, அங்கு வரும் ஆண்களை ஆபாசமாக வீடியோ எடுத்து மிரட்டிப் பணம் பறித்து வந்த நெட்வொர்க்கைச் சேர்ந்த 28 பெண்களைக் காவல்துறையினர் கைது செய்துள்ளனர்.

அசாம் மாநிலம் சில்சார் பகுதியில் இயங்கி வரும் 'லவ்லி ஸ்பா' என்ற மசாஜ் சென்டரில் சட்டவிரோதச் செயல்கள் நடப்பதாக உள்ளூர் காவல்துறையினருக்கு ரகசியத் தகவல் கிடைத்தது. இதன்பேரில், நேற்று இரவு போலீசார் அந்த மசாஜ் சென்டருக்குள் அதிரடியாக நுழைந்து சோதனையில் ஈடுபட்டனர்.

சோதனையின் போது, மசாஜ் சென்டர் என்ற பெயரில் அங்குப் பெண்களை வைத்து விபச்சாரத் தொழில் தீவிரமாக நடந்து வந்தது கண்டுபிடிக்கப்பட்டது. இதையடுத்து, சட்டவிரோதத் தொழிலில் ஈடுபட்டிருந்த ஜோர்கட், நாகாலாந்து உள்ளிட்ட அண்டை மாநில மற்றும் மாவட்டப் பகுதிகளைச் சேர்ந்த 28 பெண்களைப் போலீசார் முறைப்படி கைது செய்தனர்.

கைது செய்யப்பட்ட பெண்களிடம் போலீசார் நடத்திய அடுத்தகட்ட விசாரணையில், இந்தக் கும்பலின் பின்னணியில் இருந்த திடுக்கிடும் மிரட்டல் மாஃபியா வெளிச்சத்திற்கு வந்துள்ளது.

அசாம் மாநிலத்தின் சில்சார் பகுதிக்குச் சுற்றுலா வரும் வெளியூர் மற்றும் உள்ளூர் ஆண்களை இந்தக் கும்பல் தங்களது ஆசை வார்த்தைகளால் முதலில் மயக்கியுள்ளது. பின்னர், அவர்களைத் தங்களது மசாஜ் மையத்திற்கு வரவழைத்து, அவர்களுக்குத் தெரியாமல் ஆபாசமான முறையில் வீடியோ மற்றும் புகைப்படங்களை எடுத்துள்ளனர். அதனை வைத்து, "பணம் தராவிட்டால் இந்த வீடியோவை சமூக வலைதளங்களிலும், உங்கள் குடும்பத்தினருக்கும் அனுப்பிவிடுவோம்" என்று மிரட்டி லட்சக்கணக்கில் பணம் பறித்து வந்ததை ஒப்புக் கொண்டுள்ளனர்.

இந்த விபச்சார மற்றும் மிரட்டல் நெட்வொர்க்கின் பின்னணியில் உள்ள முக்கியத் தலைவர்கள் யார், இதன் மூலம் இதுவரை எத்தனை ஆண்களிடம் பணம் பறிக்கப்பட்டுள்ளது என்பது குறித்துச் சில்சார் போலீசார் தீவிர விசாரணை நடத்தி வருகின்றனர்.

சம்பந்தப்பட்ட மசாஜ் சென்டருக்கு உடனடியாகச் சீல் வைக்கப்பட்டுள்ளதுடன், தலைமறைவாக உள்ள அதன் உரிமையாளரைக் கைது செய்யத் தனிப்படை அமைக்கப்பட்டுள்ளது. மசாஜ் சென்டர் என்ற பெயரில் பெண்களை வைத்துக் கடத்தல் மற்றும் மிரட்டல் தொழிலில் ஈடுபட்டு வந்த கும்பல் சிக்கிய சம்பவம் அசாம் எல்லையோரப் பகுதியில் பெரும் பரபரப்பை ஏற்படுத்தியுள்ளது.