புகைப்படக் கலை சகாப்தம் ரகு ராய் காலமானார்... சோகத்தில் இந்தியத் திரையுலகம்!

இந்தியாவின் புகழ்பெற்ற புகைப்படக் கலைஞர் ரகு ராய் தனது 83 வயதில் டெல்லியில் உள்ள ஒரு தனியார் மருத்துவமனையில் காலமானார். கடந்த 2 ஆண்டுகளாகப் புற்றுநோய் பாதிப்பால் அவதிப்பட்டு வந்த அவர் தீவிர சிகிச்சைப் பெற்று வந்த நிலையில் இன்று சிகிச்சை பலனின்றி உயிரிழந்தார். இந்தத் துயரச் செய்தியை அவரது மகன் நிதின் ராய் அதிகாரப்பூர்வமாக உறுதிப்படுத்தியுள்ளார். புகைப்படக் கலை உலகில் ஈடு செய்ய முடியாத ஒரு மாபெரும் இழப்பாக ரகு ராயின் மறைவு கருதப்படுகிறது.

பத்மஸ்ரீ உள்ளிட்ட பல்வேறு உயரிய விருதுகளைப் பெற்ற ரகு ராய் இந்தியாவின் சமகால வரலாற்றைத் தனது கேமரா கண்களால் உலகிற்குப் படம்பிடித்துக் காட்டியவர். 1984 போபால் நச்சுவாயு கசிவு உள்ளிட்ட பல்வேறு முக்கிய நிகழ்வுகளை அவர் ஆவணப்படுத்திய விதம் உலக அளவில் பாராட்டுகளைப் பெற்றது. அவரது மறைவுக்குப் புகைப்படக் கலைஞர்கள், அரசியல் தலைவர்கள் மற்றும் சமூக ஆர்வலர்கள் எனப் பலரும் ஆழ்ந்த இரங்கல்களைத் தெரிவித்து வருகின்றனர். இந்தியப் புகைப்படக் கலையின் பிதாமகராகப் போற்றப்படும் அவரது மறைவு ஒரு சகாப்தத்தின் முடிவாகப் பார்க்கப்படுகிறது.

மறைந்த ரகு ராயின் இறுதிச் சடங்குகள் இன்று மாலை 4 மணிக்கு டெல்லியில் உள்ள லோதி சாலையில் உள்ள சுடுகாட்டில் நடைபெறத் திட்டமிடப்பட்டுள்ளது. அவரது உடலுக்கு உறவினர்களும் நண்பர்களும் திரளாக வந்து கண்ணீர் அஞ்சலி செலுத்தி வருகின்றனர். கலைத் துறையினர் மற்றும் அவரது ரசிகர்கள் பலரும் சமூக வலைதளங்கள் வாயிலாகத் தங்கள் நினைவுகளைப் பகிர்ந்து வருகின்றனர். இந்தியாவின் பெருமையை உலக அரங்கில் உயர்த்திய ஒரு மகா கலைஞனின் மறைவு நாடு முழுவதும் பெரும் சோகத்தை ஏற்படுத்தியுள்ளது.