மக்களவை எதிர்க்கட்சித் தலைவரும் காங்கிரஸ் மூத்த தலைவருமான ராகுல் காந்தி, வரும் ஆகஸ்ட் 1-ஆம் தேதி தமிழகத்திற்கு வருகை தரவுள்ளதாகத் தமிழ்நாடு காங்கிரஸ் கமிட்டி அதிகாரப்பூர்வமாக அறிவித்துள்ளது. சென்னையில் நடைபெறவுள்ள முக்கியக் கட்சி நிகழ்ச்சியில் பங்கேற்கவே ராகுல் காந்தி தமிழகம் வருகிறார்:

சென்னையில் ஆகஸ்ட் 1-ஆம் தேதி நடைபெறும் காங்கிரஸ் மாவட்டத் தலைவர்களுக்கான சிறப்புப் பயிற்சி முகாமில் ராகுல் காந்தி கலந்து கொண்டு உரையாற்றுகிறார். அகில இந்திய காங்கிரஸ் கமிட்டியின் அமைப்புப் பொதுச் செயலாளர் கே.சி. வேணுகோபால் அளித்த தகவலின் அடிப்படையில், இந்த வருகையைத் தமிழ்நாடு காங்கிரஸ் கமிட்டி தலைவர் மாணிக்கம் தாகூர் எம்பி தனது 'எக்ஸ்' தளத்தில் உறுதிப்படுத்தியுள்ளார்.

ராகுல் காந்தியின் வருகை குறித்து எம்பி மாணிக்கம் தாகூர் வெளியிட்டுள்ள பதிவில், "அரசியலமைப்பைப் பாதுகாக்கவும், ஜனநாயகத்தை வலுப்படுத்தவும், சமூக நீதியை நிலைநாட்டவும் இடைவிடாது போராடி வரும் நமது அன்புத் தலைவர் ராகுல் காந்தியை உற்சாகத்துடன் வரவேற்கத் தமிழகம் தயாராக உள்ளது."

"அவரது இந்த வருகை தமிழகக் காங்கிரஸ் தொண்டர்களுக்கும் மக்களுக்கும் புதிய உத்வேகத்தை அளிக்கும். வரும் 2029-ஆம் ஆண்டில் ராகுல் காந்தியை இந்தியாவின் பிரதமராக்கும் இலக்கை நோக்கி நமது பயணம் மேலும் வலுப்பெறட்டும்," எனக் குறிப்பிட்டுள்ளார்.