தமிழகத்தில் உள்ள உள்ளாட்சி அமைப்புகளில் முறைகேடுகள் மற்றும் லஞ்சப் புழக்கம் அதிகரிப்பதாகக் கிடைத்த ரகசியத் தகவலின் அடிப்படையில், லஞ்ச ஒழிப்புத்துறையினர் மாநிலம் தழுவிய அளவில் நேற்று நள்ளிரவு வரை சோதனையில் ஈடுபட்டனர். சென்னை உட்பட மொத்தம் 41 முக்கிய உள்ளாட்சி அலுவலகங்களை முடக்கி நடத்தப்பட்ட இந்த மெகா ரெய்டில், கணக்கில் வராத ₹57 லட்சம் ரொக்கப் பணம் கையும் களவுமாகப் பறிமுதல் செய்யப்பட்டுள்ளது.

உள்ளாட்சித் துறையின் பல்வேறு சான்றிதழ்கள், கட்டிட அனுமதி ஆணைகள் மற்றும் டெண்டர் ஒப்புதல்களுக்குப் பெருமளவில் லஞ்சம் கைமாறுவதாகத் தொடர் புகார்கள் எழுந்தன. இதையடுத்து, லஞ்ச ஒழிப்புத்துறை இயக்குநர் உத்தரவின் பேரில் நேற்று மாலை ஒரே நேரத்தில் நூற்றுக்கணக்கான போலிஸ் அதிகாரிகள் இந்த  சோதனையைத் தொடங்கினர்.

தலைநகர் சென்னையின் பல்வேறு மண்டல அலுவலகங்கள் லஞ்ச ஒழிப்புத்துறையின் முதன்மை இலக்காக இருந்தன. இதனைத் தொடர்ந்து தென் தமிழகத்தில் தூத்துக்குடி, திருநெல்வேலி மற்றும் மத்திய மண்டலத்தில் புதுக்கோட்டை ஆகிய மாநகராட்சி மத்திய அலுவலகங்களிலும் ஒரே நேரத்தில் அதிகாரிகள் நுழைந்து சோதனையிட்டனர்.

மாநகராட்சிகள் மட்டுமின்றி, நாமக்கல் மாவட்டம் திருச்செங்கோடு நகராட்சி, திருப்பத்தூர் நகராட்சி மற்றும் மயிலாடுதுறை நகராட்சி அலுவலகங்களிலும் இந்த லஞ்ச ஒழிப்புத்துறை வேட்டை தீவிரமாக நடைபெற்றது.

மாலை தொடங்கிய இந்த சோதனை நள்ளிரவைத் தாண்டியும் நீடித்தது. சோதனை நடைபெற்ற 41 இடங்களிலும் அதிகாரிகள் பொதுமக்களையோ, வெளிநபர்களையோ உள்ளே அனுமதிக்கவில்லை. ஊழியர்களின் செல்போன்களும் தற்காலிகமாகப் பறிமுதல் செய்யப்பட்டன.

அதிகாரிகள் நடத்திய இந்த சோதனையின் முடிவில், பல்வேறு அலுவலகங்களின் ரகசிய அறைகள், மேஜை டிராயர்கள் மற்றும் இடைத்தரகர்களிடம் இருந்து கணக்கில் காட்டப்படாத மொத்தம் ₹57 லட்சம் ரொக்கப் பணம் பறிமுதல் செய்யப்பட்டுள்ளது. இவ்வளவு பெரிய தொகை அரசு அலுவலக வளாகத்திற்குள் எப்படி வந்தது என்பது குறித்து அங்கிருந்த உயர் அதிகாரிகள் மற்றும் கணக்காளர்களிடம் லஞ்ச ஒழிப்புத்துறை போலிசார் முதற்கட்ட விசாரணையை முடுக்கிவிட்டுள்ளனர்.

கைப்பற்றப்பட்ட தொகைகளுக்கு முறையான விளக்கம் அளிக்காத பட்சத்தில், சம்பந்தப்பட்ட நகராட்சி மற்றும் மாநகராட்சி அதிகாரிகள் மீது ஊழல் தடுப்புச் சட்டத்தின் கீழ் வழக்குப்பதிவு செய்யப்படவுள்ளது. தவெக ஆட்சியில் உள்ளாட்சித் துறையை தூய்மைப்படுத்தும் நோக்கில் நடத்தப்பட்ட இந்த ரெய்டு, தமிழக அரசு அதிகாரிகள் மத்தியில் பெரும் கலக்கத்தை ஏற்படுத்தியுள்ளது.