முதல்வர் அசத்தல்... ரேஷன் கடைகளில் பாக்கெட் மூலம் பொருட்கள் விநியோகம்...!  

தமிழகத்தில் உள்ள பொது விநியோகத் திட்ட ரேஷன் கடைகளின் செயல்பாடுகளை நவீனப்படுத்தவும், பொதுமக்களுக்குத் தரமான பொருட்கள் கிடைப்பதை உறுதி செய்யவும் புதிய வழிமுறைகள் வகுக்கப்பட்டு வருகின்றன. இதன் ஒரு பகுதியாக, இனி வரும் நாட்களில் ரேஷன் கடைகளில் அரிசி, சர்க்கரை, பருப்பு மற்றும் கோதுமை உள்ளிட்ட அத்தியாவசியப் பொருட்கள் அனைத்தும் திறந்த மூட்டைகளாக வைக்கப்பட மாட்டாது. அதற்குப் பதிலாக, அனைத்தும் பாதுகாப்பான முறையில் சீல் வைக்கப்பட்ட பாக்கெட்டுகளாக விநியோகம் செய்யப்பட உள்ளன.

முதலமைச்சர் விஜய் தலைமையிலான அரசு கொண்டு வந்துள்ள இந்த புதிய முறையின் மூலம், ரேஷன் கடைகளில் பொருட்கள் விநியோகம் செய்யப்படும் போது ஏற்படும் எடைக் குறைபாடுகள் முற்றிலுமாகத் தவிர்க்கப்படும். மேலும், திறந்த வெளியில் பொருட்கள் வைக்கப்படுவதால் ஏற்படும் தூசு மற்றும் சுகாதாரக் குறைபாடுகளுக்கு இதில் தீர்வு காணப்பட உள்ளது. குடும்ப அட்டைதாரர்கள் தங்களுக்குரிய பொருட்களை எவ்வித சிரமமும் இன்றி, துல்லியமான எடையில் பாக்கெட்டுகளாகப் பெற்றுக் கொள்ள இந்த வழிமுறை வழிவகை செய்கிறது.

முதற்கட்டமாகச் சென்னையில் உள்ள குறிப்பிட்ட சில நியாய விலைக் கடைகளில் இந்த பாக்கெட் விநியோக முறை சோதனை முறையில் நடைமுறைப்படுத்தப்பட உள்ளது. அங்கு கிடைக்கும் வரவேற்பைத் தொடர்ந்து, தமிழகம் முழுவதும் உள்ள அனைத்து ரேஷன் கடைகளுக்கும் இத்திட்டம் விரிவுபடுத்தப்படும் என்று கூட்டுறவுத் துறை அதிகாரிகள் தரப்பில் தெரிவிக்கப்பட்டுள்ளது. அரசின் இந்த புதிய முயற்சியானது ரேஷன் பொருட்களின் தரத்தை உயர்த்துவதுடன், நுகர்வோர் மத்தியில் பெரும் வரவேற்பைப் பெறும் என்று எதிர்பார்க்கப்படுகிறது.