ரூ15000 வரை கட்டணங்களுக்கு இனி ஓடிபி தேவையில்ல ... ஆர்பிஐ அதிரடி!  

இந்திய ரிசர்வ் வங்கி வங்கி வாடிக்கையாளர்களின் வசதிக்காகப் பணம் செலுத்தும் முறையில் மிக முக்கியமான மாற்றத்தை அறிவித்துள்ளது. இதன்படி தானியங்கி முறையில் பணம் செலுத்தும் 'ஆட்டோ டெபிட்' வசதிக்கான வரம்பு 15,000 ரூபாயாக உயர்த்தப்பட்டுள்ளது. இதற்கு முன்னதாக 5,000 ரூபாய்க்கு மேல் பணம் செலுத்த வேண்டுமானால் செல்போனுக்கு வரும் ஒருமுறை கடவுச்சொல் எனப்படும் 'ஓடிபி' அவசியமாக இருந்தது. தற்போது இந்த வரம்பு உயர்த்தப்பட்டுள்ளதால் சந்தா கட்டணங்கள் மற்றும் காப்பீட்டுத் தொகைகளைச் செலுத்துவது இனி கூடுதல் எளிதாகும் என எதிர்பார்க்கப்படுகிறது.

இந்த புதிய நடைமுறை மூலம் டிஜிட்டல் பணப்பரிவர்த்தனைகளை மேலும் ஊக்குவிக்க ரிசர்வ் வங்கி திட்டமிட்டுள்ளது. குறிப்பாக ஓடிபி வரும் வரை காத்திருக்க வேண்டிய அவசியம் இல்லாததால் வாடிக்கையாளர்களின் நேரம் மிச்சமாகும். 15,000 ரூபாய் வரையிலான பரிவர்த்தனைகளுக்கு வங்கி கணக்கிலிருந்து தானாகவே பணம் எடுக்கப்படும் வசதியை வாடிக்கையாளர்கள் தங்களின் விருப்பப்படி மாற்றியமைத்துக் கொள்ளலாம். பாதுகாப்பான முறையில் இந்தப் பரிவர்த்தனைகளை மேற்கொள்ள வங்கிகளுக்குத் தேவையான அறிவுறுத்தல்களையும் ரிசர்வ் வங்கி வழங்கியுள்ளது.

இருப்பினும் 15,000 ரூபாய்க்கு மேல் பரிவர்த்தனை நடைபெறும் போது பாதுகாப்பு கருதி வழக்கம்போல் ஓடிபி முறை கட்டாயமாக இருக்கும். இந்த வசதியைத் தொடங்குவதற்கு முன்பாக வாடிக்கையாளர்கள் ஒருமுறை அனுமதி வழங்கினால் போதுமானது. இதன் மூலம் மாதாந்திர தவணைகள் மற்றும் இதர கட்டணங்களை எவ்விதத் தடையுமின்றிச் செலுத்த முடியும். வங்கிகள் தங்களின் வாடிக்கையாளர்களுக்கு இந்த புதிய வசதி குறித்த விழிப்புணர்வை ஏற்படுத்த வேண்டும் என ரிசர்வ் வங்கி ஆளுநர் தனது அறிவிப்பில் தெரிவித்துள்ளார்.