காவிரி நதியின் குறுக்கே கர்நாடக அரசு கட்டத் திட்டமிட்டுள்ள மேகதாது அணை விவகாரம் இரு மாநிலங்களுக்கும் இடையே மீண்டும் பெரும் அரசியல் தணலை ஏற்படுத்தியுள்ளது. நேற்று முன்தினம் தமிழ்நாடு சட்டமன்றத்தில் மேகதாது அணைக்கு எதிராக ஒருமனதாகத் தீர்மானம் நிறைவேற்றப்பட்ட சில மணி நேரங்களிலேயே, கர்நாடக நீர்ப்பாசனத்துறை மந்திரி ராமலிங்க ரெட்டி, இத்திட்டம் தமிழ்நாட்டிற்கு எதிரானது அல்ல என்றும், தமிழக முதலமைச்சர் விஜய்யுடன் பேச்சுவார்த்தை நடத்தத் தயாராக இருப்பதாகவும் பெங்களூருவில் பேட்டியளித்துள்ளார்.

பெங்களூருவில் செய்தியாளர்களைச் சந்தித்த கர்நாடக நீர்ப்பாசனத்துறை மந்திரி ராமலிங்க ரெட்டி, மேகதாது திட்டத்தின் நோக்கம் குறித்துப் பின்வருமாறு விளக்கம் அளித்தார்.  "மேகதாதுவில் அணை கட்டும் திட்டம் எக்காரணம் கொண்டும் தமிழ்நாட்டிற்கு எதிரானது அல்ல. நாங்கள் எங்களது சொந்த நிலப்பகுதியில் தான் இந்த அணையை அமைக்கத் திட்டமிட்டுள்ளோம். இதில் யாருக்கும் எந்தப் பிரச்சினையும் இருக்க வேண்டிய அவசியமில்லை.

உச்ச நீதிமன்றம் ஏற்கனவே பெங்களூரு மாநகரத்தின் குடிநீர் தேவைக்காக 4.75 டி.எம்.சி. (ஒரு டி.எம்.சி. என்பது 100 கோடி கனஅடி) நீரை அதிகாரப்பூர்வமாக ஒதுக்கீடு செய்துள்ளது. இந்த மேகதாது அணையில் சேமிக்கப்படும் நீர் 100 சதவீதம் குடிநீருக்காக மட்டுமே பயன்படுத்தப்படும்.

அணையிலிருந்து ஒரு வாளி நீரைக் கூட நாங்கள் பாசனத்திற்கோ அல்லது வேறு எந்த நோக்கத்திற்கோ பயன்படுத்த மாட்டோம். இது 100 சதவீதம் தெளிவானது. இந்தத் திட்டம் தமிழ்நாட்டு விவசாயிகளுக்கும் உபரி நீர் காலங்களில் ஒழுங்குபடுத்தி வழங்க உதவும். இவ்வளவு தெளிவான ஒரு திட்டத்தைத் தமிழ்நாடு அரசு ஏன் இன்னும் எதிர்க்கிறது என்று எனக்குப் புரியவில்லை."

தமிழ்நாடு சட்டமன்றத்தில் புதிய தவெக அரசு கொண்டு வந்த காரசாரமான தீர்மானத்தைத் தொடர்ந்து, கர்நாடக அரசு இணக்கமான முறையில் பேச்சுவார்த்தைக்கு அழைப்பு விடுத்துள்ளது.

"இந்த அணை விவகாரத்தில் எங்களுக்குத் தமிழ்நாடு அரசுடன் பேசுவதில் எவ்விதத் தயக்கமும் இல்லை. தமிழ்நாடு முதலமைச்சர் விஜய் அவர்கள் வரட்டும்; அல்லது அவர்களின் நீர்ப்பாசனத்துறை அமைச்சரை அனுப்பட்டும். நாங்கள் அனைவரும் ஒன்றாக அமர்ந்து, இரு மாநில நலன்களையும் கருத்தில் கொண்டு சுமூகமாகப் பேசி இப்பிரச்சினைக்கு ஒரு நல்ல தீர்வைக் காண்போம்."

முன்னதாக நேற்று, காவிரிப் படுகை என்பது ஏற்கனவே பற்றாக்குறையான ஒரு படுகை (டெபிசிட் பேசின்) என்றும், உச்ச நீதிமன்ற மற்றும் காவிரி நடுவர் மன்ற இறுதித் தீர்ப்புகளை மீறி, மற்ற மாநிலங்களின் அனுமதியின்றி கர்நாடக அரசு மேகதாதுவில் 9,000 கோடி ரூபாய் மதிப்பீட்டில் அணை கட்டக் கூடாது என்றும், மத்திய அரசு இதற்கு எவ்வித சுற்றுச்சூழல் அனுமதியையும் வழங்கக் கூடாது என்றும் வலியுறுத்தித் தமிழக முதலமைச்சர் விஜய் கொண்டு வந்த தீர்மானம் சட்டமன்றத்தில் ஒருமனதாக நிறைவேற்றப்பட்டது குறிப்பிடத்தக்கது.