பிரெட் அல்வா விவகாரத்தில் தகராறு... பிரியாணி கடையில் கத்திக்குத்து தாக்குதல்!
சென்னை ராயப்பேட்டையில் உள்ள பிரியாணி கடையில், பிரெட் அல்வா சுவையாக இல்லை எனக் கூறி ஏற்பட்ட தகராறு வன்முறையாக மாறியுள்ளது. கடைக்கு வந்த இரு இளைஞர்கள், அங்கிருந்த காசாளரைக் கத்தியால் தாக்கியதுடன், கடையிலும் சேதம் ஏற்படுத்தி பணத்தை எடுத்துச் சென்றதாகப் புகார் எழுந்துள்ளது.
உணவின் சுவை குறித்து வாக்குவாதம்
ராயப்பேட்டையில் செயல்பட்டு வரும் தனியார் பிரியாணி கடைக்கு வந்த இருவர், அங்கு வழங்கப்பட்ட பிரெட் அல்வாவின் சுவை குறித்து அதிருப்தி தெரிவித்ததாகக் கூறப்படுகிறது. இதையடுத்து கடை ஊழியர்களுடன் அவர்களுக்கு வாக்குவாதம் ஏற்பட்டுள்ளது.
வாக்குவாதம் முற்றிய நிலையில், இருவரும் காசாளரை கத்தியால் தாக்கியதாகவும், கடையில் இருந்த பொருட்களைச் சேதப்படுத்தியதாகவும் கூறப்படுகிறது. மேலும், கல்லாப்பெட்டியில் இருந்த பணத்தையும் எடுத்துச் சென்றதாகப் புகார் தெரிவிக்கப்பட்டுள்ளது.
இருவர் கைது
இந்தச் சம்பவம் குறித்து தகவல் அறிந்த போலீஸார் விசாரணை மேற்கொண்டனர். கடையில் நடந்த சம்பவம் தொடர்பாக இருவரைக் கைது செய்துள்ளதாகத் தகவல்கள் தெரிவிக்கின்றன. தாக்குதலுக்கான காரணம், கொள்ளையடிக்கப்பட்டதாகக் கூறப்படும் பணத்தின் அளவு உள்ளிட்ட விவரங்கள் குறித்து போலீஸார் தொடர்ந்து விசாரித்து வருகின்றனர்.உணவு தொடர்பான சாதாரண வாக்குவாதம் வன்முறையாக மாறிய சம்பவம் அப்பகுதியில் பரபரப்பை ஏற்படுத்தியுள்ளது.