சந்தைக் விலையை விடக் குறைந்த விலையில் தங்கக் காசுகள் மற்றும் நிலம் வாங்கித் தருவதாகக் கூறி 200-க்கும் மேற்பட்ட காவலர்களின் குடும்பத்தினரிடம் ரூ.20 கோடி வரை நிதி மோசடி செய்த வழக்கில், கைதான சஸ்பெண்ட் செய்யப்பட்ட பெண் காவல் ஆய்வாளர் ஷீலா மேரியைப் போலீஸ் காவலில் எடுத்து விசாரிக்க நீதிமன்றம் அனுமதி வழங்கியுள்ளது. இந்த வழக்கைப் பொருளாதாரக் குற்றப்பிரிவு காவல்துறையினர் தீவிரமாக விசாரணை செய்து வருகின்றனர்.

ராயபுரம் அனைத்து மகளிர் காவல் நிலையத்தில் ஆய்வாளராகப் பணியாற்றி வந்த ஷீலா மேரி, தனது உறவினர் பிரபுமணி மற்றும் சிலருடன் இணைந்து வாட்ஸ்அப் குழு மூலம் கவர்ச்சிகரமான முதலீட்டுத் திட்டத்தை அறிவித்துள்ளார். சந்தை விலையை விடக் கிராமிற்கு ரூ.1,400 வரை குறைவாகத் தங்கக் காசுகள் வழங்குவதாகக் கூறி, சென்னை வடக்கு மண்டலக் குடியிருப்புகளில் வசிக்கும் காவலர்கள் மற்றும் அவர்களின் குடும்பத்தினரை நம்பவைத்து முதலீடு செய்ய வைத்துள்ளனர்.

தொடக்கத்தில் அரசுக் காவல் வாகனத்திலேயே சென்று சிலருக்குக் குறைந்த விலையில் தங்கக் காசுகளை வழங்கி முதலீட்டாளர்களின் நம்பிக்கையைப் பெற்றுள்ளனர். இதனால் மேலும் பலர் பல லட்ச ரூபாயை முதலீடு செய்தனர்.

சுமார் 200-க்கும் மேற்பட்டோரிடம் ரூ.20 கோடிக்கும் அதிகமாகப் பணத்தைப் வசூலித்த பிறகு, வாக்குறுதி அளித்தபடி தங்கக் காசுகளையோ அல்லது பணத்தையோ திருப்பித் தராமல் ஏமாற்றியுள்ளனர். தனியார் வங்கி மேலாளர் ஒருவர் அளித்த புகாரின் பேரில் வழக்குப் பதிவு செய்த பொருளாதாரக் குற்றப்பிரிவு போலீசார், ஏற்கனவே பிரபுமணியைக் கைது செய்த நிலையில், தலைமறைவாக இருந்த சஸ்பெண்ட் செய்யப்பட்ட இன்ஸ்பெக்டர் ஷீலா மேரியையும் சமீபத்தில் கைது செய்தனர்.

தற்போது பெண் இன்ஸ்பெக்டரைப் போலீஸ் காவலில் எடுத்து விசாரிக்க நீதிமன்றம் அனுமதி அளித்துள்ளதால், மோசடி செய்யப்பட்ட ரூ.20 கோடி பணம் எங்குப் கைமாறியது, இதில் வேறு சில அதிகாரிகளுக்கும் தொடர்புள்ளதா என்ற கோணத்தில் விசாரணையைத் தீவிரப்படுத்தியுள்ளனர்.