தமிழகத்தில் புதிதாகப் பொறுப்பேற்றுள்ள தவெக அரசு, தங்களது தேர்தல் வாக்குறுதிகளை ஒவ்வொன்றாக நடைமுறைப்படுத்துவதற்கான ஆயத்தப் பணிகளில் ஈடுபட்டு வருகிறது. அந்த வகையில், ஏழை எளிய மாணவர்களின் உயர்கல்விக் கனவை நனவாக்கும் பொருட்டு அறிவிக்கப்பட்ட 'கல்வி வாழ்வு நிதி' திட்டத்தை அமல்படுத்துவது குறித்துத் துறை சார்ந்த அதிகாரிகள் ஆலோசனை மேற்கொண்டு வருகின்றனர்.

பள்ளிப்படிப்பை முடித்துவிட்டுப் பொருளாதாரக் காரணங்களால் உயர் கல்வியைத் தொடர முடியாமல் போகும் அரசுப் பள்ளி மாணவர்களுக்கு இத்திட்டம் ஒரு முக்கிய வாழ்வாதார உதவியாக அமையும் என எதிர்பார்க்கப்படுகிறது.

கடந்த சட்டமன்றத் தேர்தல் பிரச்சாரத்தின் போது, தமிழக வெற்றிக் கழகத்தின் தலைவர் தற்போதைய முதலமைச்சர் சி. ஜோசப் விஜய் மாணவர்களுக்கான பல்வேறு சிறப்புக் கல்வித் திட்டங்களை அறிவித்திருந்தார். அதன்படி, அரசுப் பள்ளிகளில் 12-ஆம் வகுப்பு முடித்துவிட்டு அரசு மற்றும் அரசு உதவி பெறும் கல்லூரிகளில் இளநிலைப் படிப்புகளில் இணையும் ஒவ்வொரு மாணவருக்கும் கல்லூரி சேர்க்கைச் செலவுகளுக்காக 8,000 ரூபாய் ஒரே தவணையாகக் கல்வி வாழ்வு நிதியாக வழங்கப்படும் எனத் தெரிவிக்கப்பட்டிருந்தது.

கிராமப்புற மற்றும் பின்தங்கிய சூழலில் இருந்து வரும் மாணவர்கள், கல்லூரிகளில் சேரும் ஆரம்பக் கட்டத்தில் எதிர்கொள்ளும் சேர்க்கைக் கட்டணம் மற்றும் புத்தகங்கள் வாங்குவதற்கான நிதி நெருக்கடியைக் குறைப்பதே இத்திட்டத்தின் முதன்மை நோக்கமாகும்.

தமிழகத்தின் புதிய அரசிடம் இருந்து கல்வித்துறைக்கான நிதி ஒதுக்கீடுகள் குறித்த திட்டமிடல்கள் தீவிரமாக நடைபெற்று வருகின்றன. தமிழக அரசின் இடைக்கால பட்ஜெட் கூட்டத்தொடர் நிறைவடைந்ததைத் தொடர்ந்து, பள்ளி மற்றும் உயர்கல்வித் துறை அதிகாரிகளுடன் முதலமைச்சர் விரிவான ஆய்வுக் கூட்டங்களை நடத்தத் திட்டமிட்டுள்ளார்.

இத்திட்டத்திற்கான தகுதி வரம்புகள், விண்ணப்பிக்கும் நடைமுறைகள் மற்றும் பயனாளிகளின் வங்கிக் கணக்குகளில் நேரடியாக நிதியைச் செலுத்துவது குறித்தான வழிகாட்டு நெறிமுறைகள் இந்த ஆய்வுக் கூட்டத்திற்குப் பிறகு அதிகாரப்பூர்வமாக அரசாணையாக வெளியிடப்பட வாய்ப்புள்ளதாகக் கோட்டை வட்டாரத் தகவல்கள் தெரிவிக்கின்றன.

அரசுப் பள்ளி மாணவர்களின் கல்லூரிச் சேர்க்கை விகிதத்தை மேலும் உயர்த்த இந்த நிதியுதவித் திட்டம் ஒரு உந்துசக்தியாக இருக்கும் என்பதால், மாணவர்கள் மற்றும் பெற்றோர்கள் மத்தியில் இதற்கான எதிர்பார்ப்பு அதிகரித்துள்ளது.