அமெரிக்க ராணுவ ரகசியங்களை ஈரானுக்குக் கசியவிடும் ரஷ்யா - வாஷிங்டன் போஸ்ட் அதிர்ச்சி தகவல்!

மத்திய கிழக்கில் அதிகரித்து வரும் போர் பதற்றங்களுக்கு மத்தியில், ரஷ்யா மற்றும் ஈரான் இடையிலான ராணுவ ஒத்துழைப்பு குறித்த அதிர்ச்சியூட்டும் தகவலை 'தி வாஷிங்டன் போஸ்ட்' வெளியிட்டுள்ளது. 

மத்திய கிழக்கில் உள்ள அமெரிக்க ராணுவ நிலைகள் மற்றும் அவற்றின் நகர்வுகள் குறித்த மிக முக்கியமான உளவுத் தகவல்களை , ரஷ்யா நிகழ்நேரத்தில் ஈரானுக்கு வழங்கி வருவதாக அமெரிக்க உளவுத்துறை அதிகாரிகள் தெரிவித்துள்ளனர்.

ரஷ்யாவின் மேம்பட்ட செயற்கைக்கோள் கண்காணிப்புத் தொழில்நுட்பம் மூலம் பெறப்படும் தரவுகள் ஈரானுக்குக் கைமாற்றப்படுகின்றன. இதன் மூலம்: மத்திய கிழக்கில் உள்ள அமெரிக்காவின் வான் பாதுகாப்பு நிலைகள் மற்றும் ராணுவத் தளங்களைத் துல்லியமாகக் கண்டறிய ஈரானால் முடிகிறது. ஈரானின் ஏவுகணைகள் மற்றும் ட்ரோன்கள் அமெரிக்க இலக்குகளை மிகத் துல்லியமாகத் தாக்கும் திறன் இதன் மூலம் பலமடங்கு அதிகரித்துள்ளதாக வாஷிங்டன் போஸ்ட் எச்சரித்துள்ளது.

இந்த உளவுத் தகவல் பரிமாற்றத்தில் ரஷ்யா தீவிரமாகச் செயல்பட்டாலும், சீனா இதில் எந்தப் பங்கையும் வகிக்கவில்லை என்பது குறிப்பிடத்தக்கது. ஈரானின் இத்தகைய ராணுவ நடவடிக்கைகளுக்குச் சீனா தொழில்நுட்ப ரீதியாகவோ அல்லது உளவு ரீதியாகவோ எந்த உதவியும் செய்யவில்லை என்று அந்த அறிக்கையில் தெளிவுபடுத்தப்பட்டுள்ளது.

உக்ரைன் போரில் ஈரானிய ட்ரோன்களை ரஷ்யா பயன்படுத்தி வரும் நிலையில், அதற்குப் பிரதிபலனாக ரஷ்யா இந்த உளவுத் தகவல்களை வழங்கி வருவதாகக் கருதப்படுகிறது. இது அமெரிக்கா மற்றும் அதன் நட்பு நாடுகளுக்குப் பெரும் அச்சுறுத்தலாக உருவெடுத்துள்ளது.