ரஷ்யாவில் நாடாளுமன்றத் தேர்தலுக்கான வாக்குப்பதிவு இன்று தொடங்கியது. செப்டம்பர் 18 முதல் 20-ம் தேதி வரை 3 நாட்கள் நடைபெறும் இந்தத் தேர்தலில், அந்நாட்டின் கீழவையான 450 உறுப்பினர்களைக் கொண்ட ஸ்டேட் டூமாவுக்கான உறுப்பினர்கள் தேர்வு செய்யப்பட உள்ளனர்.இந்தத் தேர்தல், 2022-ம் ஆண்டு உக்ரைன் மீதான முழுமையான போர் தொடங்கிய பின்னர் நடைபெறும் முதல் ரஷ்ய நாடாளுமன்றத் தேர்தலாகும். இதனால் சர்வதேச அளவிலும் இந்தத் தேர்தல் கவனம் பெற்றுள்ளது.

ஸ்டேட் டூமாவின் மொத்த 450 இடங்களில் 225 உறுப்பினர்கள் நாடு முழுவதும் கட்சிகளுக்கு அளிக்கப்படும் வாக்குகளின் அடிப்படையிலும், மற்ற 225 உறுப்பினர்கள் தனித்தொகுதிகளிலும் தேர்ந்தெடுக்கப்படுகின்றனர். தேர்ந்தெடுக்கப்படும் உறுப்பினர்களின் பதவிக்காலம் 5 ஆண்டுகள்.ரஷ்யாவின் கிழக்குப் பகுதிகளான கம்சட்கா மற்றும் சுகோட்கா உள்ளிட்ட பகுதிகளில் முதலில் வாக்குப்பதிவு தொடங்கியது. நேர வித்தியாசம் காரணமாக அங்கு வாக்குப்பதிவு மற்ற பகுதிகளைவிட முன்னதாக ஆரம்பிக்கப்பட்டது. நாடு முழுவதும் வாக்குப்பதிவு செப்டம்பர் 20-ம் தேதி நிறைவடைகிறது.

அதிபர் விளாடிமிர் புதினின் ஆதரவு பெற்ற United Russia கட்சி உள்ளிட்ட பல கட்சிகள் தேர்தலில் போட்டியிடுகின்றன. கம்யூனிஸ்ட் கட்சி, Liberal Democratic Party, New People உள்ளிட்ட கட்சிகளும் களத்தில் உள்ளன.தேர்தல் முடிவுகள் வாக்குப்பதிவு நிறைவடைந்த பின்னர் வெளியாகும். வாக்குப்பதிவு நடைபெறும் காலகட்டத்தில் தேர்தல் நடைமுறைகள் மற்றும் வாக்கு எண்ணிக்கை தொடர்பான தகவல்கள் தொடர்ந்து வெளியாகும்.