ரஷியாவில் 28 வயது பெண் மர்ம மரணம்! பிளேக் நோயா? 200 பேர் மருத்துவக் கண்காணிப்பில்

ரஷியாவின் சைபீரியா பகுதியில் பிளேக் தடுப்பு ஆராய்ச்சி நிறுவனத்தில் பணியாற்றிய 28 வயது பெண் மர்மமான முறையில் உயிரிழந்த சம்பவம் பரபரப்பை ஏற்படுத்தியுள்ளது. அவரது மரணத்துக்கு பிளேக் நோய் காரணமாக இருக்கலாம் என்ற சந்தேகம் எழுந்துள்ள நிலையில், ரஷிய சுகாதார அதிகாரிகள் இதுவரை அதை உறுதி செய்யவில்லை.இர்குட்ஸ்க் பகுதியில் உள்ள பிளேக் தடுப்பு ஆராய்ச்சி நிறுவனத்தில் பணியாற்றிய தர்யா ஷிபிலோவா என்ற பெண், கடந்த செப்டம்பர் 29-ம் தேதி கடுமையான நிமோனியா அறிகுறிகளுடன் மருத்துவமனையில் அனுமதிக்கப்பட்டார். அவருக்கு செயற்கை சுவாச உதவி அளிக்கப்பட்ட நிலையில், அக்டோபர் 2-ம் தேதி உயிரிழந்தார்.

அவர் பிளேக் தொடர்பான ஆராய்ச்சி நிறுவனத்தில் பணியாற்றியதால், அவரது மரணம் குறித்து பல்வேறு சந்தேகங்கள் எழுந்தன. குறிப்பாக, ஆய்வகத்தில் உயிருள்ள பாக்டீரியாக்கள் இருந்த சோதனைக் குழாய் உடைந்ததாகவும், அதன்பின்னர் அவர் நோய்வாய்ப்பட்டதாகவும் சில ஊடகங்களில் தகவல்கள் வெளியாகின. ஆனால் இந்த ஆய்வக விபத்து குறித்த தகவலை ரஷிய அதிகாரிகள் இதுவரை உறுதி செய்யவில்லை.

இதற்கிடையில், அவருடன் தொடர்பில் இருந்திருக்கக்கூடிய சுமார் 200 பேர் மருத்துவக் கண்காணிப்பில் வைக்கப்பட்டுள்ளனர். அவர்களிடம் நடத்தப்பட்ட பரிசோதனைகளில் இதுவரை பிளேக் நோய் உறுதி செய்யப்படவில்லை. சிலருக்கு கொரோனா மற்றும் ரைனோ வைரஸ் போன்ற பொதுவான சுவாசத் தொற்றுகள் கண்டறியப்பட்டதாக தகவல்கள் தெரிவிக்கின்றன.

ரஷியாவின் சுகாதார கண்காணிப்பு அமைப்பான Rospotrebnadzor, பெண்ணின் மரணத்துக்கு காரணம் தெரியாத நிமோனியா என்று தெரிவித்துள்ளது. மேலும், அவர் பணிபுரிந்த ஆய்வகத்துடன் தொடர்புடைய நோய்க்கிருமிகள் அவரது உடலில் கண்டறியப்படவில்லை என்றும், ஆய்வகத்தில் ஆபத்தான நுண்ணுயிரிகள் தொடர்பான விபத்து நடந்ததற்கான ஆதாரம் இல்லை என்றும் அதிகாரிகள் கூறியுள்ளனர்.

இந்த சம்பவத்தைத் தொடர்ந்து ரஷியாவின் தலைமை சுகாதார அதிகாரி அன்னா போபோவா இர்குட்ஸ்க் பகுதிக்கு சென்று நிலைமையை கண்காணித்துள்ளார். பொதுமக்கள் வதந்திகளை நம்ப வேண்டாம் என்றும் அதிகாரப்பூர்வ தகவல்களை மட்டுமே பின்பற்ற வேண்டும் என்றும் ரஷிய அதிகாரிகள் அறிவுறுத்தியுள்ளனர்.இதனால், பிளேக் நோயால் பெண் உயிரிழந்தாரா என்பது தற்போது உறுதி செய்யப்படவில்லை. விசாரணை மற்றும் மருத்துவப் பரிசோதனைகள் தொடர்ந்து நடைபெற்று வருகின்றன. இதுவரை அந்தப் பகுதியில் பிளேக் பரவல் ஏற்பட்டதாக அதிகாரப்பூர்வமாக அறிவிக்கப்படவில்லை.