மிஸ் இந்தியா 2026 மகுடம் சூடினார் சாத்வி சதீஷ் சைல்... கோவா இளவரசி சாதனை!
ஒடிசா மாநிலம் புவனேஸ்வரில் நடைபெற்ற 61-வது ஃபெமினா மிஸ் இந்தியா 2026 அழகிப் போட்டியில், கோவா மாநிலத்தைச் சேர்ந்த சாத்வி சதீஷ் சைல் வெற்றியாளராகத் தேர்வு செய்யப்பட்டு மகுடம் சூட்டப்பட்டார். சுமார் 30 மாநிலங்களைப் பிரதிநிதித்துவப்படுத்திப் பங்கேற்ற அழகிகளைப் பின்னுக்குத் தள்ளி, இந்த உயரிய விருதை அவர் தட்டிச் சென்றுள்ளார். அவருக்கு முன்னதாக மிஸ் இந்தியா பட்டம் வென்ற நிகிதா போர்வால், புதிய வெற்றியாளரான சாத்விக்கு வைர மகுடத்தைச் சூட்டி கௌரவித்தார்.
இந்த பிரம்மாண்ட இறுதிப் போட்டியில் மகாராஷ்டிராவைச் சேர்ந்த ராஜ்நந்தினி பவார் முதல் ரன்னர்-அப் இடத்தையும், யூனியன் பிரதேசத்தைப் பிரதிநிதித்துவப்படுத்திய ஸ்ரீ அத்வைதா இரண்டாவது ரன்னர்-அப் இடத்தையும் பிடித்தனர். புவனேஸ்வரில் உள்ள கலிங்கா தொழில்நுட்ப நிறுவன வளாகத்தில் நடைபெற்ற இந்தப் போட்டியில், "இந்த மண்ணின் புதல்விகள்" என்ற கருப்பொருளின் கீழ் இந்தியப் பெண்களின் பன்முகத்தன்மை மற்றும் கலாச்சாரம் கொண்டாடப்பட்டது. வெற்றியாளர் சாத்வி வரும் 2027-ம் ஆண்டு நடைபெறவுள்ள உலக அழகிப் போட்டியில் இந்தியாவின் சார்பில் பங்கேற்க உள்ளார்.
தமது வெற்றி குறித்துப் பேசிய சாத்வி சதீஷ் சைல், "இந்தத் தருணம் ஒரு கனவு போல உள்ளது. இந்தியாவின் பிரதிநிதியாக உலக அரங்கில் பங்கேற்பதை மிகப்பெரிய பொறுப்பாகக் கருதுகிறேன்" என நெகிழ்ச்சியுடன் தெரிவித்தார். மாடலிங் மற்றும் தொழில்முனைவோர் எனப் பன்முகத் திறமை கொண்ட இவர், புகழ்பெற்ற கீதா கோபிநாத்தால் ஈர்க்கப்பட்டுத் தனது சொந்தப் பல்கலைக்கழகத்தை உருவாக்கும் கனவு கொண்டுள்ளார். இந்தியத் திரையுலகைச் சேர்ந்த பிரபலங்கள் மற்றும் நடுவர்கள் முன்னிலையில் நடைபெற்ற இந்த நிகழ்வு, சமூக வலைதளங்களில் தற்போது வைரலாகி வருகிறது.