நேரந்தவறினால் கடுமையான நடவடிக்கை...  பள்ளிக்கல்வித்துறை அலுவலர்கள் காலை 10 மணிக்குள் வர  உத்தரவு!

தமிழகப் பள்ளிக்கல்வித் துறையைச் சேர்ந்த அதிகாரிகள் மற்றும் பணியாளர்கள் பலர் தங்களது அலுவலகங்களுக்கு உரிய நேரத்தில் வருவதில்லை என்ற குற்றச்சாட்டுத் தொடர்ந்து எழுந்து வந்தது. இந்த விவகாரம் தற்போது தலைமையின் கவனத்திற்குக் கொண்டு செல்லப்பட்டதை அடுத்து, துறை சார்ந்த அனைத்து அலுவலர்கள் மற்றும் பணியாளர்களுக்குப் பள்ளிக்கல்வித் துறை தனித்தனியாக அதிரடிச் சுற்றறிக்கை ஒன்றை அனுப்பி இருக்கிறது.

தலைமைச் செயலக அலுவலகக் கையேட்டின் விதிமுறைகளின்படி, துறையைச் சேர்ந்த அரசு சார்பு செயலாளர்கள், துணைச் செயலாளர்கள் மற்றும் கூடுதல் செயலாளர்கள் உள்ளிட்ட அனைத்து உயர் அதிகாரிகளும் காலை 10 மணிக்கு முன்னரே தங்களது அலுவலகத்திற்கு எவ்விதத் தவறுமின்றி மிகக் கண்டிப்பாக வருகை தர வேண்டும் என்று அறிவுறுத்தப்பட்டுள்ளது. இதேபோல், அலுவலக உதவியாளர்கள் மற்றும் பதிவு எழுத்தர்கள் அனைவரும் காலை 9.30 மணிக்கே தங்களது பணிகளில் இருக்க வேண்டும் என்றும் அதில் உத்தரவிடப்பட்டுள்ளது.

மேலும், பணியாளர்கள் அனைவரும் அலுவலகத்தை விட்டு வெளியேறுவதற்கு முன் தங்களது இரண்டாம் நிலை அதிகாரிகளிடம் முறையான முன்அனுமதி பெற வேண்டும் என்றும், தங்களது விடுப்புப் பதிவேடுகளைத் துல்லியமாகப் பராமரிக்க வேண்டும் என்றும் கூறப்பட்டுள்ளது. இந்த புதிய ஒழுங்குமுறை வழிகாட்டுதல்களைப் பின்பற்றத் தவறும்பட்சத்தில், சம்பந்தப்பட்ட அதிகாரிகள் மற்றும் பணியாளர்கள் மீது துறையின் விதிகளின்படி மிகக் கடுமையான சட்ட நடவடிக்கைகள் பாயும் எனப் பள்ளிக்கல்வித்துறை எச்சரித்துள்ளது.