மத்தியப் பிரதேசம் மைஹார் மாவட்டத்தில் உள்ள அமுவா தோலா அரசு தொடக்கப் பள்ளியின் தலைமையாசிரியர் சமைலால் கோல் தொடர்ந்து மதுபோதையில் பள்ளிக்கு வருவதாகப் பெற்றோர் தரப்பிலிருந்து கடுமையான புகார்கள் எழுப்பப்பட்டுள்ளன. கல்வி கற்பிக்க வேண்டிய பொறுப்பில் உள்ள ஒருவரே இது போன்ற முறையற்ற செயல்களில் ஈடுபட்டு வருவது அப்பகுதி மக்கள் மத்தியில் பெரும் கொந்தளிப்பை ஏற்படுத்தியுள்ளது. மாணவர்கள் கல்வி கற்கும் புனிதமான இடத்தைக் கெடுக்கும் வகையில் தலைமையாசிரியரின் தொடர் மதுப்பழக்கம் அமைந்திருப்பது குறித்துப் பெற்றோர் தங்களது வேதனையை வெளிப்படுத்தியுள்ளனர்.

ஒருமுறை பள்ளி வளாகத்திலேயே மலம் கழித்துவிட்டு, அந்த அசுத்தத்தை அங்கிருந்த   மாணவர்களை வைத்தே சுத்தம் செய்யச் செய்துள்ளதாகவும் அதிர்ச்சித் தகவல்கள் வெளியாகியுள்ளன. ஆசிரியரின் இந்த மனிதாபிமானமற்ற மற்றும் கீழ்த்தரமான செயலால் அதிர்ந்துபோன பெற்றோர்களும் கிராம மக்களும் பள்ளியை முற்றுகையிட்டுத் தங்களது கடும் கண்டனங்களைத் தெரிவித்தனர். பள்ளிக்கு வரும் குழந்தைகளைப் பாதுகாக்க வேண்டியவரே இது போன்ற இழிவான செயல்களில் ஈடுபடுவது கடுமையான தண்டனைக்குரிய குற்றமாகும் என்று அவர்கள் குற்றம்சாட்டியுள்ளனர்.

மாணவர்களைத் தாழ்வான வேலைகளில் ஈடுபடுத்திய இந்தச் சம்பவம் குறித்துக் கல்வித்துறை அதிகாரிகள் உடனடியாகத் தீவிரமான விசாரணையை நடத்தி வருகின்றனர். இதன் முதற்கட்டமாகச் சம்மந்தப்பட்ட தலைமையாசிரியருக்கு விளக்கம் கேட்டுத் துறை ரீதியான நோட்டீஸ் அனுப்பப்பட்டுள்ளதுடன் முறையான விசாரணைக்குப் பிறகு கடும் நடவடிக்கை எடுக்கப்படும் என்றும் தெரிவிக்கப்பட்டுள்ளது. கல்வி நிலையங்களின் நற்பெயரைக் காப்பாற்ற இதுபோன்ற ஆசிரியர்கள் மீது கடுமையான நடவடிக்கைகள் எடுக்கப்பட வேண்டும் என்று சமூக ஆர்வலர்களும் பொதுமக்களும் தொடர்ந்து வலியுறுத்தி வருகின்றனர்.