தென் அமெரிக்க நாடான வெனிசுலாவைத் தொடர்ந்து, ஜப்பானிலும் ரிக்டர் அளவுக்கோலில் 6.9 ஆகப் பதிவான சக்திவாய்ந்த நிலநடுக்கம் நேற்று ஏற்பட்டுள்ளது. எனினும், அதிர்ஷ்டவசமாக இந்த நிலநடுக்கத்தால் சுனாமி எச்சரிக்கை ஏதும் விடுக்கப்படவில்லை.

ஜப்பான் வானிலை ஆய்வு மையம் வெளியிட்டுள்ள அதிகாரப்பூர்வ அறிவிப்பின்படி ஜப்பானின் இவாத்தே மாகாணத்தின் வடக்குப் பகுதிக்கு அப்பால் உள்ள கடல் பகுதியில் இந்த நிலநடுக்கம் ஏற்பட்டுள்ளது. பூமியின் அடிபரப்பில் இருந்து சுமார் 50 கிலோ மீட்டர் ஆழத்தில் இந்த நிலநடுக்கத்தின் மையப்புள்ளி அமைந்திருந்ததாகப் புவியியலாளர்கள் தெரிவித்துள்ளனர்.

சக்திவாய்ந்த நிலநடுக்கம் ஏற்பட்ட போதிலும், நிலப்பரப்பில் இருந்து சற்று ஆழத்தில் மையப்புள்ளி இருந்ததால் பெரிய அளவிலான உயிர்ச்சேதங்களோ அல்லது கட்டிட இடிபாடுகளோ ஏற்பட்டதாக முதற்கட்ட தகவல்கள் இல்லை.

எனினும், நிலநடுக்கத்தின் அதிர்வு காரணமாகப் பாதுகாப்பு முன்னெச்சரிக்கையாக அப்பகுதியில் இயக்கப்பட்டு வந்த சில அதிவேக புல்லட் ரயில் மற்றும் சாதாரண ரயில் சேவைகள் தற்காலிகமாக நிறுத்தி வைக்கப்பட்டன. பின்னர் தண்டவாளங்கள் மற்றும் மின் இணைப்புகள் சீராக இருப்பது உறுதி செய்யப்பட்ட பின் ரயில்கள் மீண்டும் இயக்கப்பட்டன.

ஜப்பான் கடலோரப் பகுதிகளில் வழக்கமாக நிலநடுக்கம் ஏற்படும் போது சுனாமி எச்சரிக்கை விடுக்கப்படும். ஆனால், இந்த நிலநடுக்கத்தால் கடல் அலைகளில் பெரிய அளவிலான மாற்றங்கள் ஏதும் ஏற்பட வாய்ப்பில்லை என்பதால், சுனாமி எச்சரிக்கை எதுவும் விடுக்கப்படவில்லை என்று ஜப்பான் வானிலை ஆய்வு மையம் தெளிவுபடுத்தியுள்ளது.

முன்னதாக வெனிசுலாவிலும் இதேபோன்று 6.9 ரிக்டர் அளவில் நிலநடுக்கம் பதிவாகியிருந்த நிலையில், அடுத்தடுத்து உலக நாடுகளில் ஏற்படும் இந்த நில அதிர்வுகள் சர்வதேச அளவில் கவலைகளை ஏற்படுத்தியுள்ளன.